Өңірдегі білім саласын дамыту күн тәртібінде тұр. Осы ретте мұғалімдер пәндік құзіреттілікті арттыру бойынша бір апта оқыды.
Жалпы, педагогтардың шығармашылық қабілетін шыңдау білім саласындағы үлкен мәселе екені даусыз. Осы ретте облыстық білім басқармасының бастамасымен әрі облыстық әдістемелік орталықтың ұйытқы болуымен өңірдегі пән мұғалімдерінің кәсіби шеберлігін дамытып, оқу барысында жаңа әдіс-тәсілдерді үйрену үшін педагогтар Талдықорған қаласында және аудан орталықтарында арнайы дәріс алды. Онда ұстаздар пәндік құзіреттілікті дамыту бойынша ерекше мағлұматтарға ие болды.
Жетекшімізден көптеген жаңа форматтағы әдіс-тәсілдер үйрендік. Бұл курс біздің пән мұғалімі ретінде өзіміздің құзіреттілігімізді арттыруға мүмкіндік беруде. Түрлі көрнекілік құрал әкеліп, содан оқушыға білім беруге болады. Мұнда балалардың психологиясына сай әрекет етіп, ішкі танымын арттыруға болатынын білдік. Арнайы оқу кітапшасын сыйға тартты. Сол арқылы заманауи сабақ беру үлгілерін үйрендік. Оны кейін сабақ барысында да қолданса болады. Маған курс өте қатты ұнады. Ең бастысы пән мұғалімі ретінде өзіміздің кәсіби шеберлігімізді шыңдадық, – дейді Кербұлақ ауданынан келген Жансая Толғамысова.
Аталған курс 11 пән бойынша жүзеге асты. Әр пәннің өзіне тән жеке-жеке даму бағыты көрсетілді. Мың педагог бір аптаға жуық уақыт көлемінде оқып, арнайы білікті мамандардан дәріс алды.
Тренерден баланың ішкі жан-дүниесіне үңілу арқылы өзіміздің де кәсіби өрісіміз артатынын аңғардық. Курс тамаша өтті. Әсіресе ауыл мұғалімдері үшін үлкен мүмкіндік болды. Алдағы уақытта осында үйренген дүниелерді мектеп қабырғасында қолданамыз, – деді информатика пәнінің мұғалімі Айнұр Ақтанова.
Дереккөз: baq.kz
