Биыл алғаш рет спорттың 3 түрінен балалар арасында «Жетісу лигасы» атты облыстық турнирі өтеді. Бұл туралы жұмыс сапарымен Көксу ауданында болып, орталық стадионда ауылдың жас футболшылары мен кәсіпқой футбол клубының командасы және жаттықтырушылар құрамымен кездескен аймақ басшысы Бейбіт Исабаев мәлім етті.
IV Ұлттық құрылтайда Мемлекет басшысы елімізде футбол инфрақұрылымын дамытып, балалардың спортпен шұғылдануына жағдай жасаудың маңыздылығын атап өткен еді. Осыған орай биылдан бастап облыс әкімінің бастамасымен футбол, волейбол, баскетбол сынды спорттың 3 түрінен облыстық балалар турнирін өткізу туралы шешім қабылданды. Қазіргі уақытта 560 командадан өтінім түскен. Турнирге аула және мектеп командалары қатысады. Футбол ойынына 10-15 жас аралығындағы ұлдар қатысса, 12-15 жас аралығындағы қыздар волейбол, баскетбол ойынынан сынға түседі. Іріктеу кезеңі 19 сәуірде басталады. Финалдық кезең маусымға жоспарланған. Нәтижесінде футболдан 3 жас ерекшеліктері бойынша 90 бала, волейбол мен баскетболдан үздік болған 60 бала облыстық кезеңнің жеңімпазы атанады. Жеңімпаздарға марапат ретінде спорттық құрал-жабдықтар мен балалар лагерьлерінде демалуға тегін жолдама беріледі.
Облыс басшысы стадионға барған сәтте аудан балалары футбол турниріне дайындықты бастап кеткен екен. Дайындықтың қызу басталғанын көрген облыс әкімі жас футболшыларға ризашылығын білдірді.
– Біз өз тарапымыздан сендерге әрқашан қолдау көрсетіп, көмектесеміз. Сендер қазірдің өзінде кәсіби футболшылар дайындалатын стадионда жаттығып жатырсыңдар. Бала жастан футболға қызығушылық танытқандарыңа өте қуаныштымын. Спорт адамды тек биікке жетелейді. Жақсы ойнаңдар, талпыныңдар. Сендерден жақсы нәтиже күтеміз, – деген Бейбіт Исабаев балаларға доп табыстап, сәттілік тіледі.
«Жетісу» футбол клубының бас бапкері Самат Смақовпен, ойыншылармен әңгімелескен облыс әкімі Бейбіт Исабаев алдағы маусымдағы жоспарды талқылады. Ел біріншілігінің өткен ойынында команданың төмен нәтиже көрсеткенін айтқан аймақ басшысы клубқа көрсетілген қолдаудың еш нәтиже бермегеніне сын айтты. Жанкүйерлерін қуантпаған команда ойыншыларының 90 пайызы жаңартылса да жеңіс тұғырынан көрінетін күн алыс екенін тілге тиек еткен Бейбіт Өксікбайұлы жаттығу жұмыстарын күшейтуді талап етті.
– Біздің команда Премьер-лигадағы ең жас командалардың бірі. Ойыншылардың орташа жасы 25-26 жас. Бірақ әркімнің өз мүмкіндігі бар. Әзірге жақсы нәтиже көрсеткен жоқпыз, бірақ уақыт бар. Қазір ойыншылардың психологиялық дайындығына, жеңімпаздардың командалық рухын қалыптастыруға баса назар аударып жатырмыз. Нәтиже болатынына сенемін, командаға сенімдімін, – деді бас бапкер.
Клуб ойыншысы Давид Есімбеков футболды 2014 жылы бастаған. «Футболды жақсы көремін. Алғаш футболдағы жолым Текеліден басталды. Кәсіпқой футболға 2021 жылы келдім. «Жетісу» командасының негізгі және қосалқы құрамында доп тептім. Одан кейін Ресей футбол командасына шақырту алдым. Кейін «Жетісу» клубына қайта шақырғанда қуанышпен оралдым. Енді алдымызда ел біріншілігінде кем дегенде 7-орынға тұрақтау міндеті тұр. Ол үшін бізде барлық мүмкіндік бар. Өз тарапымнан бар күшімді саламын. Жанкүйерлердің үмітін ақтаймыз, – дейді Давид Есімбеков.
Облыста барлығы 639 футбол секциясы бар. Оның 455-і ауылдық жерде. Бұл бөлімдерде 63 483 адам тәлім алуда. Ал облыстағы 9 жасөспірімдер спорт мектебі мен «Жетісу» футбол орталығында 2120 бала футболмен машықтанады. Облыстың білім беру ұйымдарында мектептен тыс іс-шаралар аясында 397 секцияда 9548 бала тұрақты түрде футбол ойнайды. Тағы 273 бала мемлекеттік тапсырыс бойынша тегін секцияларға барады.
Аймақ бойынша футбол ойнауға арналған 13 стадион мен 350 футбол алаңы бар. Оның 285-і ауылдық жерде екенін айта кеткен жөн.
Еңлік КЕНЕБАЙ
