Жетісу облысы Кербұлақ ауданындағы Сарыөзек ауылының 15 мыңнан астам тұрғыны 20 миллион теңгеден астам қарыздың кесірінен ауыз сусыз қалды. Жергілікті билік барлық тұтынушыларды қарызды өтеуге мәжбүрлей алмады, деп хабарлайды Zakon.kz.

Кербұлақ ауданындағы Сарыөзек ауылының басты мәселесі – ауыз судың жиі үзілуі. Тұрақты апаттардың салдарынан ауыл тұрғындары жазда да, қыста да апталап сусыз қалады. Күз келгелі ауылда жаңа мәселе туындады.

20 миллион теңге қарыздың кесірінен жергілікті билік бүкіл ауылға ауыз су беруді белгісіз мерзімге тоқтатуға мәжбүр болды. Әкімдік суға ақша төлемегендермен келісімге келуге тырысқанымен, тұрғындар қарыздарын өтеуге асықпады.

«Сорғы станцияларына энергия беру тоқтатылды. Оған «Күреңбел су ПВХ» мемлекеттік коммуналдық кәсіпорнының «Жетісу Энерготрейд» ЖШС алдындағы қарызы себеп болды. Бүгінгі күні берешегі 20 млн теңгеден асады. Сарыөзек кентінде тұрғындармен әңгіме жүргізіліп, нәтижесінде 132 мың теңге өндірілді. Бүгінгі таңда ауылдағы жеке тұлғалардың қарызы 10 миллион теңгеден астам, ал шаруашылық субъектілерінің қарызы 10 миллионнан астам теңгені құрап отыр», — деп хабарлады Кербұлақ ауданы әкімінің баспасөз қызметі.

Әкімдік ауыл тұрғындарын қызмет көрсету мекемелеріне қарыздарын тез арада өтеуді сұрайды. Сарыөзек ауылында су қашан қалпына келтірілетінін жергілікті билік әзірге нақтылаған жоқ.

Қыркүйек айында Қонаев қаласының тұрғындары белгісіз мерзімге ыстық сусыз қалдық деп шағымданған.

 Сурет: Zakon.kz