Жолдың дәл осы бөлігі проблемалы болып саналады. Өйткені бұл жерден ауыр жүк көліктерінің қозғалысы тәулік бойы тоқтамайды. Осы арқылы жақын маңдағы цемент зауытына әктас жеткізіледі. Әктас тиеген көліктің салдары асфальттың бұзылуына әкеп соқты. Осыдан екі жыл бұрын жергілікті билік назарын осы мәселеге аудару үшін жеке жүргізушілер тіпті тас жолды жабуға дейін барды. Кербұлақ ауданы әкімдігінің басшылығы бұл мәселені шешуге уәде берді.
– Жолмен жүру мүмкін емес. Осының салдарынан автокөлігіміз жиі бұзылады. Дөңгелектер жарылады. Сөйтіп, оларды апта сайын ауыстыруға тура келеді, – дейді көлік жүргізушісі Нұрбақыт Тоқтар.
Екі жыл бұрын Сары- өзек-Көктал автокөлік жолының 178 шақырымының Қоңырөлең ауылынан Алтынемел асуына дейінгі учаскесі жөнделді. Тағы 45 шақырым автотрассаны жөндеу жұмыстары осы маусымда жалғасты. Жөндеуге 7 миллиард теңге бюджет қаражаты жұмсалады. Ауыр жүк көліктерінің мәселесі де шешілмек.
Кербұлақ ауданының тұрғын үй-коммуналдық шаруашылығы, автомобиль жолдары және тұрғын үй инспекциясы бөлімінің бас маманы Асхат Сейдахметовтың айтуынша, жүк тиеген автокөліктер жаңа жол төсемін бұзбауы үшін аудан әкімдігі техникалық жол салуға жер бөлді. Оны жыл соңына дейін тапсыру жоспарланған. Сөйтіп, барлық ауыр жүк көліктері сол жермен жүретін болады.
Сарыөзек–Көктал тас жолынан Айдарлы ауылына дейінгі жол қайта жөнделеді. Аудан орталығы Сарыөзек айналма жолының бойында да күрделі жөндеу жұмыстары жүргізіледі.
– Ағымдағы жылы негізгі құрылыс-монтаж жұмыстарын аяқтау жоспарда бар. Оны келесі жылы пайдалануға беру көзделуде. Қоңырөлең ауылынан Көкталға дейін ұзындығы 67 шақырым болатын орташа жөндеу жалғасуда. Бұл жоба өткен жылдың үшінші тоқсанында басталған. Ол биылғы жыл соңына дейін аяқталады деп күтіліп отыр, – дейді «ҚазАвтоЖол» ҰК» АҚ облыстық филиалы директорының орынбасары Жасұлан Қалтаев.
Айта кетейік, биылғы маусымда облыста республикалық маңызы бар 167 шақырым жол қайта жөнделеді.
Айгүл БАЙБОСЫНОВА
