Облыс әкімінің орынбасары Әсет Қанағатов жұмыс сапарымен Сарқан ауданына барып, Алматы – Өскемен – Лепсі – Ақтоғай авто-жолындағы жек елеген учаскелерді қалпына келтіру жұмысымен, Балқаш жағалауының инфрақұрылымын дамыту жоспарымен танысты.
«Жол» ЖШС-нің басшысы Сергей Гейдаровтың айтуынша, автожолға екіқабатты, қалған 15 шақырымға асфальт жабынының төменгі қабаты төселіпті.
– Молалы айналмасынан Лепсі ауылына дейін жол жөндеу жұмыстары жүргізілуде. 105 шықырымдық жолдың 90 шақырымына төменгі асфальт жабындысы төселді. Біз туристік маусым ашылғанға дейін асфальт жабынының төменгі қабатын төсеп, жолды ашамыз деп жоспарлап отырмыз. Жол ашылған соң үстіңгі қабатын жүргізе береміз. Қалған 15 шақырымға қаржы бөлінді, техника мен жұмысшылар жеткілікті, – дейді жолаушылар көлігі және автомобиль жолдары басқармасының басшысы Ғалымжан Дәрібаев.
Қалған 15 шақырымда асфальтқа дейінгі жұмыстар толығымен аяқталған. Жол құрылысына 150-ге жуық жұмысшы, 40 техника жұмылдырылған. Сонымен қатар, Лепсі ауылына жаңа көпір салынуда. Лепсі өзені арқылы өтетін көпір құрылысының 80 пайызы аяқталыпты.
Бұдан кейін Әсет Серікұлы Лепсі ауылына барып, Балқаш көлі жағалауының инфрақұрылымын дамытудың бас жоспарын көрді. Облыс әкімінің орынбасары жауапты мамандарға туристік маусым ашылғанға дейін демалыс орындарын сумен, жарықпен және басқа да инфрақұрылыммен қамтамасыз етуді тапсырды.
«Сапа Құрылыс 2007» ЖШС бас директоры Имаммахмұт Шағырбаев:
– Біз жол, жарық, кәріз және су құбыры сияқты инженерлік желілерді тартумен айналысамыз. Қазір Лепсі ауылындағы электрлік қосалқы стансыларын дайындаудамыз. Туристік маусым басталғанша жұмысты толық аяқтаймыз, – деді.
Сапар барысында Әсет Қанағатов өңірдегі туризмді дамыту мақсатында Балқаш көлінің жағалауындағы демалыс аймағына ерекше көңіл бөлінгенін, 15 маусымға дейін Лепсі стансысына апаратын жол жөнделетінін айтты.
– Тұрғындарға қолайлы жағдай жасау – біздің басты мақсатымыз. Көлдегі демалыс орындарына қыруар қаржы төлеуге барлығының қалтасы көтермейді. Сондықтан коммуналдық жағажайлар салуды жоспарлап отырмыз. Коммуналдық жағажай электр және су құбырларымен, демалыс орындарымен және жарықтандырумен жабдықталады. Бұл мәселелер тұрақты бақылауда, – деп түйіндеді облыс әкімінің орынбасары.
Айдар ҚАЛИЕВ
Фото: nn.aif.ru
