Бүгінгі таңда елімізде көлік-логистика саласы қарқынды дамып келеді.
Әсіресе, жүк көліктеріне сұраныс жыл сайын артуда. Бұл үдеріс ішкі нарықтағы өндіріс көлемінің ұлғаюымен, экспорт-импорт қатынастарының кеңеюімен және құрылыс, ауыл шаруашылығы салаларының дамуымен тікелей байланысты. Мәселен, соңғы жылдары облыста жүк тасымалымен айналысатын шағын және орта кәсіпорындардың саны бірнеше пайызға өсті. Көптеген кәсіпкер өз жүк көліктерін жаңартып, заманауи талаптарға сай автопарктер құрып жатыр. Бұл ретте жол сапасы мен инфрақұрылым мәселесі де күн тәртібінен түспек емес.
Бүгінде жүк тасымалы – тек экономиканың ғана емес, халықтың да тұрмыс сапасының маңызды көрсеткіші. Егер, құрылыс материалдары, азық-түлік пен ауыл шаруашылығы өнімдері уақытылы жеткізіліп тұрса, тұтынушылар мен кәсіпкерлер арасындағы байланыс нығаяды. Сондай-ақ, қазір мамандар жүк көліктерін жүргізушілер тапшылығының байқалып отырғанын да атап өтті. Бұл бағытта колледждер мен оқу орталықтарында кәсіби жүргізушілерді даярлау ісіне көңіл бөлінуде.
Жалпы, көлік логистикасы ел экономикасының күретамыры. Сондықтан бұл саладағы әрбір жаңашылдық пен жетілдіру жұмыстары еліміздің экономикалық тұрақтылығына тікелей әсер етеді. Жауапкершілік жүгі зор осындай саламен айналысуды қолға алған «Нұрым» жеке кәсіпкері Тасыбек Сқақов өз ісін жалдамалы қызметкерден бастаған. Себебі, ол логистика мен көлік саласы бойынша тәжірибеге бай. Осыны дұрыс пайдалана білген кәсіпкер жаңа деңгейге көтерілуді ойлап, өз ісін құру туралы шешім қабылдады.
Сөйтіп, осыдан 2 жыл бұрын алғашқы жүк көлігін сатып алып, облыс арасында жүктерді тасымалдау қызметтерін көрсете бастады. Тапсырыс берушілердің сенімін зор жауапкершілікпен ақтауды міндет санап, өз ісін адал атқара білді. Кәсіпкер мұнымен тоқтап қалмай, кәсібін одан әрі дамытуды қолға алды. Нәтижесінде «Банк ЦентрКредит» АҚ-ға жүгініп, жүк автокөлігін сатып алуға несие алды. Жобаға «Кепілдік қоры» бағдарламасы аясында «Даму» қорының кепілдігі берілді.
Алған қолдаудың арқасында тағы жүк көлігі сатып алынып, тасымалдау көлемі ұлғайтылды. Ендігі кезекте компания тұрақты табыс тауып, тұрақты бірнеше тұтынушымен ынтымақтастық орнатуды, аймақ бойынша жүктерді уақытылы әрі сапалы жеткізуді қамтамасыз етуді және жүргізушілер үшін жұмыс орындарын құруды мақсат етіп отыр. Сонымен бірге аймақтан тыс жерлерге шығу, логистикалық қызметтерді дамыту және жеткізуді бақылау мен жоспарлаудың цифрлық шешімдерін енгізу көзделуде.
Айгүл БАЙБОСЫНОВА
Талдықорған қаласы
