Жетісу облысында жол инфрақұрылымын жақсарту бағытындағы жұмыстар биыл да қарқынды жүргізілді, – деп хабарлайды 7-su.kz ақпараттық порталы облыс әкімінің баспасөз қызметіне сілтеме жасап.
Жыл қорытындысы бойынша өңірде жергілікті маңызы бар 381,7 км жол жөндеуден өтті. Оның 152,2 км облыстық маңызы бар жолдар болса, 229,5 км 54 елді мекендегі ауылішілік көшелер. Осындай ауқымды жұмыстардың нәтижесінде облыстағы жақсы және қанағаттанарлық жағдайдағы жолдардың үлесі 95 пайызға жетті. Бұл көрсеткіш өңірдегі көлік қатынасының сапасын жаңа деңгейге көтеріп, тұрғындардың қауіпсіз қозғалысын қамтамасыз етуге мүмкіндік береді.
Соңғы үш жылдың ішінде Жетісу облысындағы 188 елді мекеннің ішкі көшелері жаңартылды. Сонымен қатар республикалық маңызы бар ірі күре жолдарды жаңғыртуға ерекше көңіл бөлінді. Атап айтқанда, «Талдықорған – Үшарал» және «Үшарал – Достық» автомобиль жолдары толық жөнделіп, пайдалануға берілді. Бұған дейін «Үштөбе – Көпбірлік» жолы ретке келтірілсе, биыл «Сарыөзек – Қорғас» бағытындағы жұмыстар аяқталды. Жоспар бойынша 2026 жылы «Талдықорған – Үштөбе» автомобиль жолы жөндеуден өтетін болады.
Жалпы алғанда, 2023-2025 жылдар аралығында облыста 1138 шақырымнан астам жергілікті жол жөнделді. Инфрақұрылымның мұндай қарқынмен дамуы өңірдің транзиттік әлеуетін арттырып қана қоймай, шалғайдағы ауылдардың облыс орталығымен байланысын нығайта түседі. Жол сапасының жақсаруы – өңір экономикасының өсуіне және туризм саласының дамуына тікелей ықпал ететін басты фактор.
