Қазақстан Республикасының Премьер-Министрі Әлихан Смайыловтың төрағалығымен өткен Үкімет отырысында «Дені сау ұлт» ұлттық жобасын іске асыру барысы қаралды.
Селекторлық жиында Денсаулық сақтау министрі Ажар Ғиният «Дені сау ұлт» жобасының созылмалы сырқаттар мен олардан болатын өлім-жітімнің алдын алуға негіз болғандығын айтты. Министрдің айтуынша, қанайналым жүйесі сырқатының салдарынан орын алатын өлім-жітім 21,4%-ға, қатерлі ісік кесірінен 8,7%-ға, тыныс алу ағзаларының ауруларынан 23%-ға және туберкулезден 12%-ға төмендеген. Халықтың жалпы өлім-жітімі 15,5%-ға азайған. Денсаулық сақтау саласында алғашқы медициналық көмектің сапасына ерекше көңіл бөлінеді. Бұл ауылдық жерлерде барынша жандандырылуда.
Денсаулық сақтау министрі Ажар Ғиният шалғай, ауылдық елді мекендерді медициналық-санитарлық алғашқы көмек және диагностикамен қамту 47%-дан 49%-ға дейін жеткізілгендігін айтты. Ол аудандық ауруханаларға кезекпен заманауи компьютерлік томограф, рентген аппараттарының алынып жатқандығын жеткізді. Қатерлі ісік кеселіне шалдыққандарды емдеу үшін гамма-пышақ және ядролық медицина орталықтарында 300-ден астам ота жасалып, нәтижесінде 400-ге жуық сырқаттың емделіп шыққанына тоқталды.
Баяндамашының сөзінен кейін Премьер-Министр Әлихан Смайылов денсаулық сақтау нысандарын салуға, медициналық техника сатып алуға, заманауи технологияларды енгізуге, кадрларды оқытуға көңіл бөлініп, мол қаражат жұмсалып жатқанын айтты. Мәселен, қымбат медициналық зерттеулер жүргізу мүкіншілігі артып, радиохирургиялық емдеуге арналған орталықтар ашылып, денсаулық сақтау саласы қызметкерлерінің жалақысы өскен.
Премьер-Министр: «Мемлекет басшысының тапсырмасы бойынша «Ауылда денсаулық сақтауды жаңғырту» пилоттық жобасы әзірленуде, 2025 жылға қарай ауылдық елді мекендерде 650 алғашқы медициналық-санитарлық көмек нысанын салу көзделіп отыр.Сондай-ақ, 32 аудандық аурухана жаңғыртылатын болады», – деді. Ол жиында медицина саласындағы кемшіліктерді де атап өтті. Халықтан дәрігерлік көмектің көлемі жеткіліксіз деген шағым түсіп жатқанын айта келіп, Денсаулық сақтау және Қаржы министрлігіне саланы қаржыландыруды тапсырды.Сондай-ақ, өңірлермен бірлесіп, заманауи перинаталдық орталықтар салу және балалар ауруханаларын керекті жабдықтармен жарақтандыру жөнінде шаралар қабылдау қажеттігін жеткізді. Жиын төрағасы жауапты министрліктерге сұранысқа ие мамандарды оқыту үшін гранттарды көбейтуді тапсырды.
Гүлжан ТҰРСЫН
