Синоптиктердің дерегінше, 8 желтоқсан күні Қазақстанның аймақтарында бірқатар қауіпті ауа райы орын алуы мүмкін.
Жетісу облысы.
Өңірдің таулы аудандарында көктайғақ байқалмақ. Солтүстік, батыс және орталық бөліктерде тұман түсуі ықтимал. Алакөл көлдері маңында күндіз желдің екпіні 15-20 м/с-қа дейін артады. Талдықорғанда да күннің кей бөлігінде тұман түседі.
Түркістан облысы.
Оңтүстік және таулы аудандарда қатты жаңбыр мен қар аралас жауын өтеді. Солтүстік пен таулы өңірлерде көктайғақ байқалады. Өңірдің батысы, оңтүстігі және орталығы тұманды болады. Таңертең және күндіз таулы аймақтарда желдің күші 15-20 м/с-қа дейін жетеді.
Шымкентте күндіз қатты жаңбыр жауады, қала аумағында тұман түсуі мүмкін. Түркістан қаласында да тұман болады.
Алматы облысы.
Таулы аймақтарда қар қалың түседі. Таңертең және күндіз көктайғақ байқалады. Солтүстік, оңтүстік және таулы аудандарды тұман басады. Күндіз облыстың шығысында жел күшейеді (15-20 м/с). Алматыда да тұман түсуі ықтимал.
Ақтөбе облысы.
Солтүстік және шығыс аумақтарында көктайғақ байқалады. Ақтөбеде күндіз жолдарда тайғақ болуы мүмкін.
Атырау облысы.
Солтүстік және шығыс бөліктерде тұман түседі.
Абай облысы.
Батыс, оңтүстік және орталық аймақтарда тұман байқалады.
Астана.
Елордада қар жауып, бұрқасын болады. Жолдарда көктайғақ орын алады.
Қарағанды облысы.
Өңір аумағында қар жауып, жаяу бұрқасын соғады. Көктайғақ пен тұман бірнеше аудан мен қалада байқалады. Қарағандыда 8 желтоқсанда көктайғақ тіркелуі мүмкін.
Шығыс Қазақстан облысы.
Солтүстік, оңтүстік және орталық аудандарда тұман түседі.
Жамбыл облысы.
Таулы аймақтарда түнде қалың қар, күндіз жаңбыр мен қар аралас жауын өтеді. Таулы өңірлерде жаяу бұрқасын байқалады. Көктайғақ пен тұман тіркеледі. Таулы аудандарда жел 15-20 м/с-қа дейін күшейеді. Таразда көктайғақ пен тұман болуы ықтимал.
Павлодар облысы.
Қар жауып, бұрқасын жүреді. Жолдарда көктайғақ байқалады. Батыс және солтүстік аудандарда желдің жылдамдығы 15-20 м/с-қа дейін жетеді. Павлодар қаласында қар мен бұрқасын өтеді.
Ұлытау облысы.
Солтүстік, шығыс және орталық өңірлерде қар, жаяу бұрқасын, көктайғақ және тұман байқалады. Жезқазғанда түнгі және таңертеңгі уақытта жолдарда тайғақ болуы мүмкін.
Батыс Қазақстан облысы.
Батыс, солтүстік және оңтүстік аудандарда тұман түсіп, жолдар тайғақ болады. Оралда түнде және таңертең көктайғақ орын алады.
Маңғыстау облысы.
Батыс, солтүстік-шығыс және орталық бөлігі тұманды болады, көктайғақ байқалады. Солтүстік-батыста желдің екпіні 15-20 м/с-қа дейін артады. Ақтауда түнде және таңертең жолдарда тайғақ болуы мүмкін.
Қызылорда облысы.
Солтүстік, оңтүстік және орталық бөліктерде көктайғақ пен тұман байқалады. Қызылордада түнде жолдардың тайғақтығы тіркеледі.
