Тіл сарайы ғимаратында ардагерлер ұйымының ұйымдастыруымен ауызбіршілікке, адалдыққа ұмтылдыратын «Адал адам – Адал еңбек – Адал табыс» тақырыбында «дөңгелек үстел» өтті.
Жас ұрпақты жақсыға үйрету, жаманнан жиренту мақсатында ұйымдастырылған басқосуда ұлттық құндылықты ұлықтау да назардан тыс қалмады. Өскелең ұрпақтың болашағына алаңдаған ардагерлер бүгінгі күннің өзекті тақырыптарын саралап, келешекке төнер қауіп-қатердің алдын алуда ілкімді істердің атқарылып жатқанын тілге тиек етті.
Облыстық ардагерлер ұйымының төрағасы Ермек Келемсейіт жиынды ашып, шараның мақсатымен таныстырды. Сонымен қатар, облыс әкімінің Әдеп жөніндегі өкілі Ғабит Тұрсынбайұлы, облыстық «Қоғамдық келісім» КММ басшысы Руфина Усанова, ардагер ұстаз Жұмабала Балақаранова, Қаратал ауданының «Жастар таңдауы» қоғамдық бірлестігінің жетекшісі Нұржан Нұрланұлы, жергілікті полиция қызметі басқармасының бастығы полковник Қайсар Жақсылықбекұлы, полиция департаментінің есірткі қылмысына қарсы іс-қимылы басқармасының өкілі Меруерт Сеитқызы, Талдықорған қаласының бас имамы Жансерік Алпысбаев жастардың бүгінгі беталысы жайлы кеңінен сөз қозғап, бірнеше мәселелерді ортаға салды.
«Дөңгелек үстелде» Мемлекет басшысының наурыз айындағы Ұлттық құрылтайда сөйлеген сөзі, халықты бірлікке, татулыққа шақыру, ұлттық құндылық, әділдік, дін мен қоғамның үйлесімі және жастардың құқықбұзушылығы мен есірткіге тәуелділігі сөз болды.
Гүлнұр ЕРМҰХАНҚЫЗЫ
