«Мектепке жол» республикалық акциясы аясында Талдықорғандағы «Тең қоғам» қолдау орталығында бір топ балаға көмек көрсетілді.
Шараға Қазақстан мұсылмандары діни басқармасы төрағасының орынбасары, наиб муфти Кенжеәлі Мырзабаев, Жетісу облысының бас имамы Алмас Данағұлов қатысып, әлеуметтік аз қамтылған, көпбалалы отбасылар мен мүгедектігі бар 26 оқушыға мектепке қажетті құралдар таратылды.
Орталықтың үйлестірушісі Дәулет Ауданбаев өз сөзінде республика көлемінде өтіп жатқан «Мектепке жол» акциясында балаларды оқу, тәрбие ісінен шет қалдырмай, оларға материалдық көмек көрсету одан әрі де жалғаса беретіндігін айтып, балаларға деген ақ тілегін жеткізіп, жомарттық танытқан демеушілерге мекеме атынан алғыс білдірді.
Жалпы, «TEN QOGAM» орталығы 2022 жылдың сәуір айынан бастап Алматы, Жетісу облысы бойынша мүгедектігі бар адамдарды тұрақты жұмысқа орналастыру, грант алуға көмектесу, әлеуметтік қолдау шараларын жүргізуде.
ӨЗ ТІЛШІМІЗ
