Жаңа оқу жылы қарсаңында Жібек жолы ауылындағы қазақ орта мектебіне ұлт ұстазы Ахмет Байтұрсынұлының есімі берілді. Осыған орай жуырда аталған білім шаңырағы әйгілі Алаш қайраткерінің құрметіне арналған «Ашық алаң» ұйымдастырды.
Ұлт зиялысы ұлықталған кездесуге Алматыдағы Ахмет Байтұрсынұлы атындағы Тіл білімі институты мен Қазақ Ұлттық университетінен ғалымдар келді. Қонақтар алдымен білім шаңырағын аралап көріп, жетістіктерімен танысты. Шәкірттердің білім деңгейі мен ұстаздар ұжымының әлеуетін сұрап білді. Ашық алаң Алаш арысының туған топырағы Торғай өңіріндегі өлкетану музейімен танысудан басталды. Мектептің Ахмет Байтұрсынұлы атындағы залымен онлайн-форматында байланысқа шыққан музей қызметкерлері Ахаңның қайталанбас қайраткерлігі мен қилы өмір жолының куәгері болған музей жәдігерлерін экран арқылы көрсетті. Кездесуде сөз алған ғалымдар жас ұрпақтың жадына Байтұрсынұлы тұлғасын ұялатудың маңыздылығына жан-жақты тоқталды. Қазақ тіл білімі мен әдебиеттану ғылымының негізін салушы, ұлттық жазудың реформаторы, әйгілі ағартушы әрі кеңестік қызыл саясаттың қиянатын көріп, отыз жетіде опат болған ұлт қайраткері Ахмет Байтұрсынұлын қазақ баласы бір сәтке естен шығармауы тиіс. Кездесуде айтылған құнды ой-пікірлер оның елі үшін еткен жанкешті еңбегін біліп өскен жас ұрпақ қашан да ұлтына адал, рухы биік перзент болары анық деген тұжырымдармен қорытындыланды.
Тағылымды шара барысында ұстаздар қауымы да сөз алып, ұлы тұлғаның есімі берілген алтын ұяның білім сапасы мен тәрбие деңгейі биік болуы тиіс екенін жақсы сезінетіндерін және соған сай нәтижелі еңбектеніп жатқандарын білдірді. Мәртебелі есімді иеленген мектеп атына кір келтірмейтін білікті ұстаздар мен жетістігі көп шәкірттер мұнда расында жетерлік. Ахмет Байтұрсынұлының атын алған білім мекемесінде биылғы оқу жылында мектеп табалдырығын жаңадан 325 бүлдіршін аттап, 13 бірдей бірінші сынып ашылыпты. Жалпы білім шаңырағында бүгінде үш мың оқушы бар, оларға 238 ұстаз дәріс береді.
Бұрынғы атауы Шамалған бекетіндегі білім ордасы 2003 жылы заман талабына сай қолдануға ыңғайлы жоба бойынша 1200 оқушыға арнап салынған. Мектеп ғимаратындағы әрбір оқу бөлмесі кең әрі жарық. Қазіргі заманға сай инновациялық технологиялармен жарақтандырылып жатыр. Алайда оқушы санының көптігінен қазір үш ауысыммен жұмыс істейді. Бүгінде мектеп ауласынан 600 орынды қосымша жапсаржай құрылысы жүргізіліп жатыр. Сондықтан көп ұзамай үш ауысым мәселесі оң шешімін табатындығын айтты мектеп басшылығы.
Серік САТЫБАЛДИЕВ
