Жалаңаш ауылындағы Жамал Ермегияев атындағы орта мектепте «Отбасы отбасына көмектеседі, баланы мектепке жинайық!», «Мектепке жол – шекарасыз жақсылық» қайырымдылық акциялары өткізілуде.
Акцияның мақсаты – аз қамтылған және көпбалалы отбасылардан шыққан, ата-ана қамқорлығынсыз қалған жеткіншектерге жаңа оқу жылына дайындық жасауда қолдау көрсету.
Баланы мектепке даярлау – ата-ананың борышы десек те, қазіргі қымбатшылық қысқан заманда көптің көмегіне жүгінбеске болмай тұр. Осыған орай жаны жайсаң, қолы ашық, жомарт жандарды балалардың мектепке жан-жақты дайындықта баруы үшін көмек қолын созуға шақырамыз. «Кең болсаң, кем болмайсың», «Не берсең де балаға бер, бала үшін жаса» деген халқымыздың игі дәстүрі биыл да қолдаусыз қалмайды деп сенеміз. Дәстүрлі шараға жылда атсалысып жатқан шаруа қожалығы иелері, жеке кәсіпкерлер мен ата-аналарға шексіз алғыс білдіреміз. Әлі де балаларға көмек қолын созғысы келетін қайырымды жандарды акцияға атсалысуға шақырамыз.
Мектеп тарапынан жаңа оқу жылында жас ұрпақтың алаңсыз білім алуы үшін 1- 4-сынып оқушыларының барлығын тегін тамақтандыруды ұйымдастыру бойынша дайындық жүргізілуде. Сондай-ақ, оқушылар тегін оқулықтармен 100 пайыз қамтамасыз етілетін болады.
И. Қиялбаева,
Жамал Ермегияев атындағы орта мектеп директорының
тәрбие ісі жөніндегі орынбасары
Кеген ауданы
Алматы облысы
