Бразилияда болатын (9-14 желтоқсан) волейболдан клубтар арасындағы әлем чемпионатының басталуына екі күн қалды. Азияның үздік командасы есебінде сынға түсетін «Жетісу» Сау-Паулу қаласындағы алғашқы жаттығуын өткізді.
Алғашқы жаттығу ойдағыдай өтті. Командадағы қыздардың көңіл-күйі жақсы. Клубтар арасындағы әлем чемпионатына екінші мәрте қатысқалы отырмын (Осыған дейін «Алтай» сапында ойнады). Тартысты, әрі қызық ойын күтемін. Бастысы жаһанның мықтыларымен ойнау арқылы мол тәжірибе жинаймыз, — дейді «Жетісу» волейбол клубының капитаны Кристина Анкионова.
Физикалық жағынан шыңдалып, тактикалық тұрғыданда бапкерлер құрамы ойыншыларға жан-жақты ақыл-кеңес айтып, жаттығуда сан қайталап пысықтап, ойында жүзеге асырып көруге барынша тырыспақ.
Құрлық ауыстырып, күнмен түнді алмастыру әрине қиын. Дей тұрғанмен тыңғылықты дайындық жүргізіп жатырмыз. Бұл менің жеке тарихымдағы ең ұзақ сапар болды. Осыған дейін «Алтайдың» бапкері есебінде әлемдік додада сынға түссем, енді «Жетісудың» жаңа тарихын жазуға барымды саламын. Қытай қызы Мяо Ивеньнің команда қатарына қосылғанына бар болғаны екі күн болды. Сол аралықта барынша сөйлесітік, жаттығып жатыр. Бірақ клубтар арасындағы әлем чемпионатына толық дайын емес. Алдағы уақытта өзінің үздік ойынын көрсететініне сенімдімін, — дейді «Жетісу» волейбол клубының бапкері Марко Гршич.
10 желтоқсан | 01:00
“ЖЕТІСУ” (Қазақстан) — “Савино Дель Бене” (Италия)
10 желтоқсан | 21:30
“ЖЕТІСУ” (Қазақстан) — “Альянца Лима” (Перу)
12 желтоқсан | 04:30
“ЖЕТІСУ” (Қазақстан) — “Озаску Сан-Кристован” (Бразилия)
*Қазақстан уақытымен көрсетілген.
Серік ҚАНТАЙ
арнайы Бразиялиядан
