Бала көңілі мейірімге, жанашырлыққа, жылылыққа толы болады. Сол ізгіліктің ұшқынын өшірмей қолпаштап отыру керек. Ал бала бойындағы өнердің дамуына атсалысу айналасындағы жандарға міндет. Еркежан Рахымның балабақша қабырғасында жүргеннен әнге құмарлығы байқалған. Ол қазіргі уақытта көптеген байқауда топ жарып жүр.
Еркежан Талғатқызы облыс орталығындағы №15 орта мектептің 1 «Б» сыныбында оқиды. Ата-анасы қызының өнерге жақын екенін 4 жасынан байқапты. Ол үйдегілеріне: «Мен өскенде әнші боламын, сахна төрінде тұрып көп ән айтамын», – дейді екен. Оның тілегін құп көрген әке-шешесі Еркежанды Оқушылар сарайындағы ән үйірмесіне береді. Жас өреннің талпынысын жетекшісі Шынар Бейсбекова да қуаттайды. Музыкалық білім беріп, жақсы нәтиже көрсетуіне күш-жігерін жұмсайды.
Жас өнерпаз «Сүйем сені, Қазақстан», «Ұлт мақтанышы», «Анашым», «Қазақстан», «Школа» сынды 10-ға жуық ән біледі. Әндерін мектеп сахнасында орындап, көпшіліктің ыстық ықыласына бөленуде.
Еркежан халықаралық «Таланттылар мен талаптылар» байқауында I орын, республикалық «Дала сазы» байқауында бас жүлде, республикалық көпжанрлы «Brilliant» байқауында лауреат, республикалық балалар шығармашылық байқауында I орын иегері атанған нағыз өнерлі қыз. Оның болашағынан үйдегілері, ұстаздары көп үміт күтеді.
Талантты оқушының алар асуы әлі алда екені айқын. Өнерінің өрісті, жолының ашық болуына тілекшіміз.
