Мемлекет басшысы Қасым-Жомарт Тоқаев он бір бөлімнен тұратын биылғы Жолдауында бүкіл әлемді алаңдатып отырған пандемияның ел тұрғындарының табысына кері әсері мен оған қарсы атқарылып жатқан нақты іс-шараларды көрсете келіп, алдағы болашақта ел дамуы үшін жасалатын қадамдарды айтуы халықтың көңілінен шықты.
Қазақстан халқын экономикалық-әлеуметтік дамуға бастайтын бұл Жолдауда барлық саланың мәселелері мен оны шешу жолдарына назар аударылған. Тұрмыс сапасын арттыру, кәсіпкерлікті қолдау, инфрақұрылымды дамыту, халықты әлеуметтік қорғау, баспана мәселесін шешу сынды халықтың көкейінде жүрген әлеуметтік мәселелерге де баса көңіл бөлінген.
Солардың бірі 2021 жылдан бастап ұстаздардың еңбекақысының 25 пайызға өсуі және азаматтардың сауаттылық деңгейі мен олардың цифрлық білімін арттыру мақсатында Үкіметке үздіксіз білім беру тұжырымдамасын әзірлеу жөнінде тапсырма беруі деп білеміз. Бұл игі шара ұрпағымыздың білім сапасының артуына оң ықпал етеді. Қашықтан білім беру жүйесінде барынша дамытылған онлайн білім беру мәселесін шешу қажеттілігін де атап өтті. Сондай-ақ, 2022 жылдан бастап 2025 жылға дейін мәдениет қызметкерлерінің, мұрағатшылардың, кітапханашылардың, техникалық қызметкерлердің, көлік жүргізушілерінің, қорықшылардың жалақысын жыл сайын орта есеппен 20 пайызға өсіруді тапсырды. Бұл өз кезегінде аталған сала қызметкерлерімен бірге өткен тарихы мен қазіргі кезден сыр шертетін құжаттық мұраларды ұқыпты сақтау мен насихаттау жолында жұмыстар атқарып жатқан архившілерге де ерекше серпін берді.
Ел Президенті Қасым-Жомарт Тоқаевтың Қазақстан халқына Жолдауындағы Үкіметке жүктеген тапсырмалары мен алға қойған мақсаттарының орындалуына тілектестігімді білдіре келе осынау маңызды құжаттың мемлекетті нығайту, отандық бизнесті қолдау, халықты әлеуметтік қорғау және экономиканы дамыту сияқты мәселелерді шешуге тың серпін беретініне сенімдіміз. Мемлекет басшысының бастамаларын толық қолдаймыз!
Спандияр Кекрелиев,
Алматы облысының мемлекеттік архивінің ведомстволық архивтермен жұмыс жасау және жинақтау бөлімінің архивисі
