Қазақстан мен Ресей басшыларына «Астана – Мәскеу» бағытындағы жүргізушісіз жүк көлігі автобағытының іске қосылуы таныстырылды, – деп хабарлайды 7-su.kz ақпараттық порталы.
Жобаны екі елдің көлік министрліктері «КамАЗ» жария акционерлік қоғамымен бірлесіп жүзеге асырды. Нәтижесінде жүк автокөліктерінің жүргізушісіз қозғалысы сәтті іске қосылды.
Жүк көліктері Қазақстан – Ресей шекарасындағы «Жаңа жол» өткізу бекеті арқылы бір мезетте өтіп, межелі бағыттарына жол тартты.
Бұл – әлемде алғаш рет жүргізушісіз жүк көліктерінің осындай форматта халықаралық бағытта қозғалысқа шығуы. Автокөліктер шамамен 3 мың шақырым қашықтықты екі тәулікте жүріп өтті. Осылайша, сапар уақыты дәстүрлі тасымалмен салыстырғанда екі есеге қысқарды.
Мамандардың айтуынша, жаңа технологияларды енгізу логистикалық тиімділікті арттырып, жүк тасымалының жылдамдығын едәуір жақсартады.
Тараптар алдағы уақытта жобаны одан әрі дамыту үшін қажетті инфрақұрылымды жетілдіріп, институционалдық базаны қалыптастыру жұмыстарын жалғастырады.
