Ескелді ауданында 3123 гектарды құрайтын жаздық бидайдың 2700 гектары орылды. Әр гектардан 18 центнер, жалпы өнімнен 4860 тонна бидай қамбаға жіберілді. Сондай-ақ, өңірде 26788 гектар масақты дәнді дақылдар себіліп, бүгінде 6517 гектар күздік бидай орылып, 12500 тонна астық бастырылды. Дәл қазіргі сәтте 75 астық оратын комбайн, 93 тіркемесімен автомашина, 29 трактор астық жинаудың қызған шағында қызмет істеп жүр.
Аудандағы Бөктерлі ауылында 1998 жылдан бері егін және мал шаруашылығымен айналысып келе жатқан «Есімжанов» шаруа қожалығы биыл 163 гектарға бидай сеуіп, ору науқанын бастап кетті.
– Бүгінде шаруа қожалығы өз қызметкерлерімізді толықтай мал азығымен қамтып отыр. Астық жинау қарқынды жүріп жатыр. Дәл қазір 3 комбайн мен Камаз жұмыс істеуде. Біздің жоспар – округ бойынша қызылша көлемін арттыру. Биыл 205 гектар қызылша отырғызылды. Сонымен қатар, мал басын көбейтіп, егін мөлшерін арттыру жоспарда. Мемлекетіміз шаруаларға қолдау білдіріп отырғанда, тек жақсы нәтиже көрсетуіміз керек, – дейді қожалық басшысы Мұхит Есімжанов.
Ал мал азығын дайындау жұмыстары да қарқынды жүргізіліп жатыр. Биыл мал қыстату кезеңіне қажетті деген 109.5 мың тонна шөптің 79,7 мың тоннасы дайын. Егіншілер тарапынан 29,8 мың тонна пішендеменің 17,0 мың тоннасы, 40,6 мың тонна сабанның 8,1 мың тоннасы әзір. Кезекте шаруашылықтар тамыз айының соңында сүрлем дайындауға кіріседі.
Қали АСҚАР
