Сарқан ауданындағы шаруашылықтардың жай-күйі жақсы. Биыл астық бітік шығып, шаруалар орақ оруға дайын отыр. Жаз бойы тынымсыз еңбектің арқасында қамбаға мол астық толады. Дәл осындай егіні бітік шыққан қожалықтың бірі – ауданда тұқым шаруашылығымен айналысатын «Душкин С.Н» шаруа қожалығы.
Сергей Душкиннің ірі шаруа қожалығы тұқым өсірумен айналысқанына 7 жылдан асқан. Осы жылдар арасында қожалықтың жер көлемі он есеге артқан. Алғашында 200 гектардан бастаған шаруашылықтың бүгінде 2300 гектар егістік алқабы бар. 1720 гектарына элиталық арпа тұқымын өсірсе, 566 гектарына күнбағыс еккен.
Минералды тыңайтқыштар субсидияланады, жанар-жағармайды арзандатылған бағамен алады, техниканы да лизингке сатып алған.
Жалпы, шаруа қожалығының материалдық-техникалық базасы көңіл толарлықтай. Өзінің астық қырманы, қоймалары, таразылары, 11 тракторы мен 3 комбайны бар. Соның қатарына лизингке алған америкалық «Massey Ferguson» маркалы тракторлар, «Jonn Deer» маркалы комбайндарын қосыңыз.
«Jonn Deer 9420 R» тракторы егіс алқабында барлық жұмысты атқаруға қауқарлы – жер қазады, топырақты қопсытады, деңгейлейді, тұқым себеді, егістік қабатын тереңдетеді, тіпті дөңес жерлерде де тоқтаусыз жұмыс істейді. Олар электронды басқарылады, бұрынғыдай рөлді ұстап отырудың қажеті жоқ. Заманауи тракторлар мен комбайндарды операторлар басқарады.
Ірі шаруашылық Ақтұма ауылының 47 тұрғынын тұрақты жұмыспен қамтып отыр. Ал маусым кезінде олардың саны 60-тан асады. Орташа айлық жалақылары – 200-250 мың теңге. Тегін тамақтанады. Өздерінің күнделікті қажеттіліктері үшін фермерлер азын-аулақ ірі қара ұстайды. Қызметкерлеріне сыйақы береді, тіпті, маусымда үздік жұмыс істегендерге шетелде демалуға жолдама да қарастырылған.
Жалпы биыл «Душкин С.Н.» ШҚ лизингке құны 341,5 млн. теңге болатын 14 ауыл шаруашылық техникасын сатып алды, соның ішінде тіркемесі бар 5 трактор бар. Ал Сарқан ауданы көлемінде 7 айда шаруалар 1 млрд. 595 млн. теңгеден асатын сомаға 92 ауыл шаруашылық техникасын сатып алған.
Бас агроном Виктор Стежкиннің айтуынша, шаруашылық өзін бірінші репродуктивті арпа тұқымымен толық қамтып отыр. Екінші репродукциялы тұқым бүкіл облыс көлемінде сатылады. Сонымен қатар, оның басым бөлігі, яғни 6 мың тонна арпа Текелі қаласындағы «Суфле Қазақстан» ашытқы зауытына өңдеуге жөнелтіледі. Зауыт өз тарапынан өнімнің әр тоннасының 10%-ын субсидиялайды. Тұқымның бір бөлігі ауданның қажеттілігі мен жергілікті фермерлік шаруашылықтар үшін қалдырылады. Минералды тыңайтқыштар субсидияланады, жанар-жағармайды арзандатылған бағамен аламыз, техниканы лизингіге сатып алдық, –деп жұмыстың жай-жапсарын айтып өтті.
Биыл арпаның әр гектарынан 35-40 ц өнім алған, гектарынан 20 ц күнбағыс жинаймыз деп жоспарлап отыр.
Ришад ТҰРҒАНБАЙ
