Қазақстан Республикасының Конституциясы күніне орай Талдықорғандағы «Жастар» мәдениет және демалыс саябағында «Ел тірегі, ел бақыты – Ата Заң!» атты мерекелік шара өтті. Жұртқа мерекелік көңіл-күй сыйлаған шараға облыс әкімінің орынбасары Жақсылық Омар қатысты.
Президентіміз Нұрсұлтан Әбішұлы Назарбаев өз сөзінде «Конституция – біздің тәуелсіздігімізді нығайтып, мемлекет пен жалпы қоғамда мызғымас тұрақтылықты қалыптастырды», – деген болатын. Бүгінгі таңда Конституцияның тәтті жемісін көріп келеміз. Қоғамымыздың беріктігіне, тыныштығына, өркендеп қанат жаюына Ата Заңымыздың тигізген үлесі орасан. Егемендік алғаннан кейін Ата Заңымыз 1995 жылғы 30 тамызда жалпыхалықтық референдумда қабылданып, 5 қыркүйекте күшіне енді.
Егеменді қазақ елі Конституциясының қабылданғанына 22 жыл толған мерекелік шара облыстық Бикен Римова атындағы драма театрының әртістері әзірлеген «Дала заңы – баба заңы – Ата Заң» атты театрланған шағын көріністен басталды. Қасым ханның қасқа жолы мен Есім ханның ескі жолы, қазақ хандығын 30 жыл басқарған әз Тәукенің «Жеті жарғысы» қойылымда көрініс тапты. «Жеті жарғыда» көрсетілген мүлік, қылмыс, әскери, елшілік, жұртшылық, жесір дауы мен құн дауы туралы жарғылар жеке-жеке айтылды. Қойылымның ерекше тұсы да сол – жарғының не үшін, қалай туғандығын көрсету. Әз Тәуке сөз басын Асанқайғының:
«Әділдіктің белгісі,
Біле тұра бұрмаса.
Ақылдының белгісі,
Өткен істі қумаса.
Жамандардың белгісі,
Жауға қарсы тұрмаса.
Залымдардың белісі,
Бейбіттің малын ұрласа.
Надандардың белгісі,
Білгеннің тілін алмаса» – деп бастап, ел болу үшін, ел шебінің берік болуы үшін «Жеті жарғының» жазылғандығын жеткізді. Бүгінгі Конституцияның негізі болған әз Тәукенің «Жеті жарғысын» сахналау барысында театр әртістері үлкен шеберлік көрсетті.
Конституция туралы рухты өлеңдермен жалғасқан қойылымды, бүлдіршіндерден құрылған хор «Туған жер» әнімен жалғастырды.
Мерекелік шараның екінші кезеңінде облыс әкімінің орынбасары Жақсылық Омар жиналғандарды құттықтап, өзінің ақжарма тілегін айтты. «Бүгінгі таңда тұрақтылық пен тыныштықты, ынтымақ пен ырыс-құтты ту етіп, айбары асқан мемлекетке айналып, озық реформаларды енгіздік. Еліміздің әлеуметтік-экономикалық дамуына және тұрғындардың әл-ауқатының артуына қол жеткіздік. Еңсесі биік егемен ел болған ширек ғасырдан асқан уақыт ішінде Қазақстан дамудың даңғыл жолына түсіп, Орталық Азияда көш бастап келеді. Мұндай айтулы жетістіктердің барлығына «біз, ортақ тарихи тағдыр біріктірген Қазақстан халқы» деген терең сөздермен мақтанатын Ата Заңымызға негізделген ұлтаралық және дінаралық татулықтың арқасында қол жеткіздік», – деп сөзін түйіндеді Жақсылық Мұқашұлы.
Шара «Ата Заң – айбыным» тақырыбындағы Сүйінбай атындағы филармонияның және «Талдықорған әуендері» фольклорлық-этнографиялық ансамблінің мерекелік концертімен көңілді аяқталды. Бастысы, меркелік леп жиналғандарды қуанышқа бөледі.
Серік ҚАНТАЙ.
