Адам және оның өмірі, құқықтары мен бостандықтары еліміздің ең қымбат қазынасы екені ҚР Конституциясының І-бабында айқын жазылған десек, басты құндылық болып саналатын адамның өмірінде бауыр еті баласынан артық ұлы сый, нығмет жоқ екені тағы рас. Әр шаңырақтың базары мен қуанышы, келешегіміздің жалғасы, болашағымыздың кілті – біздің бал тілді балапандарымыз екені анық. Сол балапандарымыздың бақытты, уайым-қайғысыз өмір сүруіне жағдай жасау әр азаматтың басты міндеті деп түсінемін.
Әр ата-ана балаларына жарқын болашақ сыйлау үшін адал еңбек етіп, ұлағатты өмір жолын сілтеп, тәлім-тәрбие беріп, балаларының дұрыс азамат болып өскенін қалайды. Өмірде өз орындарын тапқанын тілейді. Алайда, елімізде қатал тағдырдың сынағына ілініп, бақытты, алаңсыз балалық шақты арман еткен бүлдіршіндеріміз де жеткілікті.
Адам өміріндегі ең берекелі, қайырлы істің бірі – мұқтаж жандарға қол ұшын созу, жәрдемдесу.
Халықаралық балаларды қорғау күніне орай Қабанбай ауылының кәсіпкерлері, атап айтсақ Қабанбай ауылындағы «Grand Hall» мейрамханасының иелері ерлі-зайыпты Африкан Ким мен Елена Малахова және «Лағманхана» кафесінің иесі Ерлан Кенжасар аз ғана уақытқа болса да балапандардың көңілдеріне қуаныш пен шаттық ұялатып, бақыт сыйлады.
Аталған кәсіпкерлер қай мереке болсын белсенділік танытып, үлкен-кішіге бірдей жүрек жылуларын шашып, мейірім мен жақсылық сыйлап жүрген азаматтар.
А. Ким мен Е. Малахова жыл басында 160 балаға дастарқан жайып, жаңажылдық сыйлық таратып еді. Сонда керемет мерекенің куәгері болғанбыз. Қасиетті Рамазан айында 200 адамның аузын ашса, Балаларды қорғау күнінде де 172 балаға мерекелік, балалар тағамдарына толы дастарқан әзірлеп, балмұздақ таратты. Мәдениет үйі мен балалар шығармашылық орталығының ұжымымен концерттік бағдарлама ұйымдастырып, үлкен қуаныш сыйлады.
Жеке кәсіпкер Кенжасар Ерлан да мұндай игі істерден құралақан емес. Рамазан айында Теректі ауылының мешітінде 100 адамға ауыз аштырып, Балаларды қорғау күнінде 2000 балаға балмұздақ таратып, түрлі мультфильм кейіпкерлерін қонаққа шақырып, үлкен шара өткізді.
Бұл кәсіпкерлер ауылымызда өтетін түрлі шараларға да тұрақты қолдау көрсетіп келеді. Оқу жылының басталуы қарсаңында «Мектепке жол» акциясы аясында көптеген балаға оқу құралдары мен киім алып береді. Міне, осындай қайырымды істің демеушісі болып отырған азаматтарды аудан, облыс көлемінде танып-білсе, мейірімді жандардың қатарлары көбейсе, елдің алғысы мен шапағатына бөленсе екен деген ниетпен мақала жазуды адамдық борышым деп шештім.
Өңіріміздің жүздеген баласына қуаныш сыйлаған жомарт жүрек жандарға кәсіптері алға бассын, мерейлері үстем болсын деген ниетпен айтар алғысым зор.
Салтанат ДАУТБАЕВА,
Алакөл аудандық
мәслихатының депутаты
