І. Жансүгіров атындағы Мәдениет сарайында орналасқан №389 сайлау учаскесі бүгін таңғы 07.00-ден жұмысын бастап, Парламент Мәжілісі мен барлық деңгейдегі мәслихаттар депутаттарының кезектен тыс сайлауын өткізу үшін ашылды. Ертелетіп жеткен алғашқы дауыс берушілерге бағалы сыйлықтар табысталып, сайлаудың ашық өтуін байқаушылар қадағалап отырды.
Жалпы, Жетісу облысында барлығы 458 сайлау учаскесі, 443 мыңнан астам сайлаушы бар. Учаскелердің барлығы белсенді жұмыс атқарып жатыр. Талдықорғанның орталығындағы І.Жансүгіров Мәдениет сарайында орналасқан №389 сайлау учаскесінде 2380 сайлаушы тіркелген. Оның ішінде 18 жасқа толған 10 адам бар.
Орталық алаңдағы сайлау учаскесіне дауыс беру үшін келген облыс әкімі Бейбіт Исабаев:
– Мен өзімнің конституциялық құқығымды пайдаланып, жүрегім қалаған саяси партияға және жекелеген кандидаттарға дауыс бердім. Сол арқылы Қазақстанның болашағы үшін, жас ұрпақтың ертеңі үшін таңдау жасадым, – деп түсініктеме берді.
Облыс әкімінің саяси науқанға қатысуы көпшіліктің ынта-ықыласын оятты.
Мәди Алжанбай,
Талдықорған қаласы
