Қазір әрбір қоғам мүшесі үшін қаржылық сауаттылық ауадай қажет. Сананы тұрмыс билеген тұста алдауға да, арбауға да даяр тұратындардың қарасы көбейді. Көлденең көк аттыдай көлбең қаққан қаржы пирамидалары талайдың қалтасын қағып әлек. Одан қалды, заңсыз, заңсыз болғанда ешқандай тіркеуі, рұқсаты жоқ лотереялар да талайды сазға отырғызуда.
Өңір тұрғындарын осындай әккілердің аранында кетірмес үшін облыстық экономикалық қылмысқа қарсы күрес департаменті «Жас Ұрпақ» қоғамдық бірлестігімен бірлесіп «Jetisu.NET» жобасын қолға алды. Аталмыш жоба – қаржылық сауаттылық орталық.
Жетісу облысының экономикалық тергеу департаменті басшысының орынбасары Мирас Құрбановтың айтуынша, аталмыш жоба тұрғындардың сұранысына сай туындаған. Әрі қазіргі уақытта аса қажет. Себебі, алаяқтардың араны қатты. Осындай қажеттіліктен қолға алынған қаржылық сауаттылық орталығында семинарлар мен психологиялық тренингтер ұйымдастырылады. Әдеттегідей өтті-кетті емес, тұрғындарды кең ауқымды оқыту ойластырылған.
Жетісу облысы бойынша экономикалық тергеп-тексеру департаментінің аса маңызды істер жөніндегі жедел уәкілі Ербол Құрманбаев өңірде заңсыз лотерея ұйымдастыру азаймай тұрғанын алға тартып отыр. Жыл басынан бері әлеуметтік желідегі лотерея қызметі үшін 9 адам әкімшілік жауапкершілікке тартылған. Сонымен қатар, қаржы пирамидалары туралы жарнама таратқан 13 аккаунт анықталыпты. Алаяқтық мақсатты көздеген 246 сілтеме бұғатталған.
«Jetisu.NET» жобасының үйлестірушісі Дархан Асқанбаев бұл бастаманың лудоманиямен және басқа да экономикалық қылмыстармен күресте маңызды екенін алға тартады. Сонымен қатар, халық арасында құқықтық сауаттылықты арттыруға ықпал ете отырып, тұрақты экономикалық және әлеуметтік ортаны құруға бағытталатын болады.
Дастанбек САДЫҚ
