“Қуанышты бөліссең көбейеді” демекші, ақындар мен батырларға бай Жетісу жерінің жас өнерпазы, Жетісу университетінің 4-курс студенті, жас әнші Дәурен Берікболов Қырғызстанда өткен “АЙМАК ЫШКЫБОЗДОРУ – 2020” атты халықаралық байқауында Алматы облысының атынан қатысып, I орын иеленді.
Жеңіспен оралған өнерпаз Қырғыз мемлекетіндегі «Жыл таңдауы – 2020» премиясын да қанжығасына байлап қайтты.
Дәурен бұған дейін де айырқалпақты ағайындардың ауылына барып, түрлі байқауларға қатысып, жүлделі орыннан көрінген болатын. Мәселен, 2019 жылы Көшпенді халықтар фестиваліне қатысып, екінші орыннан көрінген еді. Үштөбелік жас өнерпаз өз елімізде де байқаулардың алдыңғы орнынан көрініп, өз тыңдармандарын қуантып жүр. Заман талабына сай эстрадалық ән жанрын таңдап, жастарды патриоттық әнімен рухтандырып жүрген Дәурен Берікболұлына алдағы күнде де сәттілік тілеп, елдің атын шарықтата берсін деген тілек айтамыз!
Ришад ТҰРҒАНБАЙ
