«Қанша жерден мықты маман болсам да үйде әйелмін», – дейді жас кәсіпкер Әдемі Есеншораева. Темірден түйін түйген балқаштық келіншек ойын алаңшаларын жасап, тұтынушыларды тәнті етуде. Кәсіпкерлік пен ұсталықты ұштастырып, «нарыққа жаңаша леп әкелсем» деген ару ерекше кәсіптің қыр-сырын айтып берді.
Әдемі Ұланқызының негізгі мамандығы – бухгалтер. Екі қызды өсіріп отырған аяулы жар, ибалы келін жоғары оқу орнын бітіріп, жұбайы екеуі саудамен айналысқан. Тапқан табысына қанағаттанбаған келіншек екі жыл бұрын мүлде басқа бағытқа жол салады. Кәсіби білімі болмаса да дәнекерлеу ісін меңгеріп, кәсібін ашады.
– Ең алғашқы кәсібіміз – фотосалон болатын. Жолдасыммен соңғы рет жаңажылдық шырша саттық. Ісіміз дөңгеленіп, 10 метрлік шыршаға тапсырыс түсе бастады. Дәнекерлеушілерді жалдап жүріп, неге өзім де жасап көрмеске деп қолыма дәнекерлеуші құралды ұстап көрдім. Әр жасаған жұмысымнан ләззат алдым. Осылайша дәнекерлеу ісін меңгердім, – дейді 25 жасар келіншек.
Әдемінің бұл мамандықты меңгеруіне жолдасы қарсы болмаған. Қайта оны демеп, жасаған өнімдерін саудаға шығаруға кірісіп кеткен. Кәсіпкер бұл ісін қыз балаға жат санамайды. Еңбектің ебін таба білген ол әкімдіктен жалға жер алып, арнайы шеберханасын ашқан. «Бизнес бастаудың» арнайы жобасына қатысып, нарық заңдылықтарын игере бастаған Әдемі өтімді дүние өндіруге көшкен.
– Бастапқыда қорқыныш болды. Өйткені өндірісте қауіпті құралдарды қолымызға алып, бірін кесіп, екіншісіне жалғаймыз. Бұл – қателікті кешірмейтін сала. Темірді өлшеммен кесіп, сақтықпен біріктіреміз. Қауіпсіздік ережесін жадымыздан шығармаймыз. Екі жылдан бері аудандағы саябақтар мен балалардың ойын алаңшаларындағы әткеншек, тағы да басқа қажетті дүниелерді жасап жатырмыз. Балабақшаға қажетті өнімдерімізді еліміздің түкпір-түкпіріне жеткізіп береміз. Дайын жұмыстар бар, тапсырыс арқылы жасатуға болады. Жолдасым бұл салаға келуіме қарсы болмады. Ал анам әлі күнге ұялады, дәнекерлеуші екеніңді ешкімге айтпа дейтін, қазір көз жеткен соң ба, дұрыс қабылдайды барлығын, – дейді ол.
Өз ісін жандандырып отырған еңбек адамының өмірлік арманы асқақ. Күнделікті тапқан несібесі бүтін бір отбасының бақуатты тұрмыс кешуіне жеткілікті екенін айтады. Бұйыртса, алдағы уақытта кәсібін кеңейтіп, жандандыруды қолға алмақ. Сәтін салса балқаштық дәнекерлеуші келіннің өнімі өтімді дүниеге айналғалы тұр. Бүгінде Нұр-Сұлтан мен Алматыда өнімдерін сататын арнайы дүкен ашып, кәсібін көркейтіп отыр.
Өмір КЕНЖЕҰЛЫ
