Адам баласы үшін денсаулық бәрінен де қымбат әрі бағалы. Сондықтан да дана халқымыз «Денсаулық – зор байлық» деп текке айтпаған. Бірақ өмірде адам адамға себепкер болып, бір-біріне көмек қолын созуы адамдықтың, кісіліктің белгісі саналады. Сол себепті де біз үнемі жанашырлық танытуға міндеттіміз. Біз ұйымдастырған «Донор бол – өмір сыйла» акциясы осыған дәлел.
Дүниежүзілік қан доноры күніне орай, ҚР Мемлекеттік қызмет істері агенттігінің Жетісу облысы бойынша департаменті мемлекеттік қызметшілердің қатысуымен «Донор бол – өмір сыйла» акциясы өтті. Қоғамдағы түрлі жағдайға бейжай қарамайтын мемлекеттік қызметшілердің қанға мұқтаж жандарға көмектесу мақсатында ұйымдастырылған шараға 100-ге жуық мемлекеттік қызметші қатысып, белсенділіктерін танытты.
Жалпы, «донор» сөзі латын тілінен аударғанда «сыйлау» деген мағына береді. Демек, донор болған адам өзгенің өмір сүруіне себепкер бола алады. Бірақ кез келген адам қан орталығына барып, донор бола алмайды. Оның өзіндік бекітілген нақты талаптары мен міндеттері бар. Десе де жақының немесе өзге адам болсын жақсылық жасау – әркімнің азаматтық парызы екенін ұмытпайық.
Жыл сайын дәстүрге айналған шараға биыл облыстың жергілікті және орталық мемлекеттік органдарынан қатысқан мемлекеттік қызметкерлер өздерінің игі істерімен көпке үлгі бола білді. Мұндай айтулы шара алдағы уақытта да өз жалғасын табады.
Маржан САЙДИЛЬДИНА,
ҚР мемлекеттік қызмет істері
агенттігінің Жетісу облысы бойынша
департаментінің бас маманы
