Облыс әкімінің орынбасары Батыржан БАЙЖҰМАНОВТЫҢ төрағалығымен әлеуметтік әріптестік пен әлеуметтік-экономикалық және еңбек қатынастарын реттеу жөніндегі облыстық үшжақты комиссияның кезекті отырысы өтті. Аталған басқосуда үш мәселе қаралды.
Онда аймақтағы еңбек қатынастарының жай-күйі, қызметкерлердің еңбек құқықтарын қорғау және еңбек жанжалдарына ықпал ететін факторлардың алдын алу бойынша кәсіподақ бірлестіктерінің жұмысы, әлеуметтік әріптестік пен әлеуметтік және еңбек қатынастарын реттеу жөніндегі аудандық (қалалық) үшжақты комиссиялардың жүргізген жұмыстары пысықталды. Бірінші мәселе бойынша еңбек инспекциясы бойынша басқарма басшысының орынбасары Әділбек Далбағаев баяндады.
Айтуынша, өткен жылы әртүрлі меншіктегі 343 кәсіпорын мен ұйымдарда жоспардан тыс тексеру жүргізілген. Нәтижесінде 391 заңбұзушылық анықталып, 218 ұйғарым берілген. Жалпы, 23,7 млн. теңгеге 213 әкімшілік айыппұл салыныпты. Сонымен бірге жұмыс берушілердің уақытылы жалақы төлеуі, жаппай жұмыстан босатуға жол бермеу, еңбек заңнамасын сақтау туралы қабылданып жатқан шаралар жөнінде айтылды. Отырыс барысында жұмыс берушілер де тыңдалды.
Осы ретте «Еңбек Жауғашты» РМК заң кеңесшісі Жәнібек Дидарбеков, «Шандунь провинциясының Луцяо корпорациясы» ЖШС қазақстандық филиалы директорының әкімшілік мәселелер жөніндегі орынбасары Айгүл Жұмабаева сөз сөйледі. Екінші мәселеге қатысты «Алматы облысының Кәсіп-одақ орталығы аумақтық кәсіподақтар бірлестігінің» төрағасы Әсет Қыдырманов аумақтық кәсіподақтар бірлестіктерінің өткен жылы атқарған жұмыстары туралы хабарлама жасады.
Белгілі болғандай, үшжақты келісім аясында кәсіподақтар жұмыс берушілердің арасында еңбек заңнамасын оқыту және түсіндіру жұмыстарын жүргізген. Сондай-ақ, еңбек жанжалдарында келіссөздер жүргізе білу дағдыларын дамыту және консенсусқа қол жеткізу бойынша оқыту тренингтерін өткізген. Даулардың алдын алу үшін «Татуласу орталықтары» ашылып, медиаторлар жанжалдарды шешуге ықпал еткен. Қабылданған шаралар әлеуметтік еңбек қатынастарының тұрақтылығын қамтамасыз етуге және әлеуметтік шиеленіске, еңбек жанжалдарына жол бермеуге мүмкіндік береді.
Осыған байланысты «Алматы кәсіподақтары одағы» аумақтық кәсіподақтар бірлестігінің төрағасы Қайрат Қаратаев қызметтерінің маңызды бағыттарының бірі ақпараттық жұмыс екенін және осы бағыттағы жұмысты күшейту міндетін қойғанын айтты. Бұған қосымша «Алматы облыстық білім және ғылым қызметкерлерінің кәсіподағы» қоғамдық бірлестігінің төрағасы Садық Әбдіқадыров ойын жеткізді. Оның сөзінше, білім және ғылым қызметкерлері кәсіподағының Алматы облыстық ұйымы білім беру саласы қызметкерлерінің құқықтары мен заңды мүдделерін қорғау жолында бірқатар жұмыс жүргізетінін атап өтті.
Өткен жылы аудандық және қалалық үшжақты комиссиялардың 73 отырысы өткізілген. Аудан және қала әкімдіктері кәсіподақтармен бірлесе отырып, кәсіпорындармен өндірістік үрдістерді тұрақтандыру және жұмыс орындарын сақтау бойынша, оның ішінде шетелдік жұмыс күшін тартатын кәсіпорындармен өзара ынтымақтастық туралы меморандумдар жасау бойынша белсенді жұмыс жүргізген. Үшінші мәселе төңірегінде аудандық және қалалық үшжақты комиссия төрағаларының есептері тыңдалды.
Отырысты Батыржан Құлаймергенұлы қорытындылап, әлеуметтік әріптестік тараптарына еңбек заңнамасы нормаларының сақталуын бақылауды қамтамасыз ету, еңбек жанжалдарының алдын алу және түсіндіру жұмыстарын бірлесіп жүргізу бойынша шаралар қабылдау туралы тапсырмалар берді.
Айгүл БАЙБОСЫНОВА
