«Тексан Қазақстан Инвест» жауапкершілігі шектеулі серіктестігінің жарық-электр жабдықтарын шығаратын Қазақ-түрік бірлескен зауыты Шолаққарғалы селолық округіне қарасты Қасымбек ауылында орналасқан. Кәсіпорын айына орта есеппен 200 мың бірлік өнім шығарады.
Бұдан сегіз жыл бұрын 25 жұмысшымен іске қосылған кәсіпорында бүгінде 160-тай адам тұрақты жұмыс істейді. Нарық сұранысына орай өндіріс орнында шығарылатын өнім түрлері де айтарлықтай көбейді. Мұнда жарықдиодты шамдардың 350-ден астам түрі өндіріледі. Олардың қатарында кеңсеге, көшеге, тұрмысқа және өнеркәсіп орындарына арналған әртүрлі шамдар бар. Оған қажетті пластик, метал бөлшектердің барлығы да зауыттың өзінде құйылып, құрастырылып, тұтынушыға дайын өнім түрінде ұсынылады. Кәсіпорында, сондай-ақ, электр сымдарының түр-түрі өндіріледі. Сонымен қатар, металдан да көптеген тауар дайындалады. Оқушы парталары, көшеге, саябақтарға арналған әдемі орындықтар, кеңсе сейфтері, терминал жәшігі, төсек, басқа да бұйымдар жоғары сапасымен ерекшеленеді.
Өндіріске озық технология енгізу ісі үнемі жүргізіледі. Мәселен, металлға ойылатын ою-өрнектер заманауи лазер қондырғысымен салынады. Елімізде сапалы электр тауарларына деген нарық сұранысының едәуір бөлігін бүгінде осы зауыт өтеп келеді. Өнімдері өз елімізден тыс Қырғызстан, Өзбекстан сияқты таяу шетелдерге жөнелтіледі. Сондай-ақ, Парсы шығанағы мен Латын Америкасына да экспортталады.
Кәсіпорынның болашағы зор. Өйткені электр жабдықтарына деген сұраныс артпаса, кемімесі анық. Сондықтан жылдан-жылға өнім түрлерін түрлендіріп, сапасын арттыру зауыт басшылығының басты назарында.
Мұнда жергілікті тұрғындар да көптеп еңбек етеді. Олар Қасымбек ауылымен қоса негізінен жақын маңдағы Үмбетәлі, Мыңбаев, Ұзын-ағаш ауылдарынан келіп істейді. Жұмысқа ынталы ауыл жастарын істің қыр-сырына үйретіп, тұрақты орналастыруға зауыт басшылығы ықыласты. Ал алыстан келетіндер үшін зауыт жанынан арнайы 100 орынды жатақхана салынған. Жатақханаға орналасқандар тегін тұрады, онда тұрмысқа және тынығуға қажетті қолайлылықтар қарастырылған, бильярд бөлмесі бар. Ал аулада теннис, шағын футбол алаңы жабдықталған. Жұмысшылар еңбегіне қарай тиісті еңбекақыларын уақытылы алады. Жұмыс істеймін деген ауыл жастарына осындай жағдай жасалған.
Серік САТЫБАЛДИЕВ
