«Green Tau» жобасының бастамашысы кәсіпкер Роман Мартыненко. Ол өңірдің туристік әлеуетін арттыруда айрықша еңбек сіңіріп жүрген азамат. Қазіргі уақытта Текеліде туристерге қолайлы жаңа демалу аймағының құрылысын жүргізуде. Биыл 10 коттедж жұмысын іске қосуды көздеп отыр.
– Көріп тұрғандарыңыздай, бұл жер өте әсем, табиғаты ерекше. Болашақта 30, мүмкін 50-ге жуық коттедж салу жоспарымызда бар. Біз шамамен 2 шақырымға созылатын коммуникация желілерін жүргіздік: электр қуаты, су жүйесі және кәріз желісі тартылды. Экоүйлер толықтай ағаштан салынған, сондықтан экологиялық тұрғыдан өте таза. Нысан «Весёлая Поляна» деп аталатын жерде, бірінші және екінші кордонның ортасында орналасқан. Теңіз деңгейінен 1200 метр биіктікте тұр. Бұл аумақта спорттық шаралар өткізуге, жаттығулар жасауға өте қолайлы, – дейді ол.
Кәсіпкер демалыс аймағы іске қосылған соң демалушыларға тюбингпен сырғанау, квадроциклмен серуендеу, атпен қыдыру сияқты қызмет түрлері ұсынылатынын айтады. Қазір оның қарамағында тұрақты түрде 15 қызметкер бар, қажет болған жағдайда қосымша 5–7 адам шақырылады.
Роман нысандарды салу кезінде айналасындағы бір шыбықты кеспей, не бір жаңа өскінге зиянын тигізбеуді мақсат еткен. Көздегені – табиғатты барынша сақтап қалу. Оның бар тілегі «қала әкімдігі демалыс аймағына қарай жол төсеп берсе екен», – дейді.
Расында жол салынбаса бұл төбеге жетудің машақат екенін біз де байқадық.
Медет ЖҰМАБАЙ
