Көрнекті мемлекет қайраткері, болмысы бөлек, жаратылысы ерек дара тұлға Алтынбек Сәрсенбаев тірі болса, алдағы күзде 60 жасқа келетін еді. Әттең, дүние-ай десеңші, асқан дарынды, сарабдал саясаткер қаскөйлердің қолынан қапыда қаза тапты.
Одан бері де жылдар жылжып барады. Н. Назарбаевтың тұсындағы билік Алтынбектің еңбегін, ісін ешқандай елеген жоқ. Оған бір көшенің де аты бұйырмады. Туып-өскен Райымбек ауданындағы өзі білім алған Сарыжаз орта мектебіне атын беру туралы ұсыныс та жабық күйінде қалды. Тіпті, сол мектептің қабырғасына «Бұл мектепте мемлекет және қоғам қайраткері Алтынбек Сәрсенбаев білім алды» деген жазуы бар тас белгіні ілудің өзі үлкен күшке түскен. Бірақ Алтынбектей алтын азаматын халқы ұмытқан жоқ. Алтекеңнің Райымбек ауданына қарасты Сарыжаз ауылындағы сыныптас құрдастары оның биылғы 60 жылдығында игілікті шаруаны қолға алыпты. Қаражат жинастырып, Сарыжаз ауылында түрлі іс-шаралар өткізбек. Алтынбектің 60 жылдығы аясында спорттық жарыстар ұйымдастырылады. Оның сыртында үлкен ас беріледі. Бұл игілікті істен Алтынбектің құрдастары ғана емес, ауыл тұрғындары, азаматтары да сырт қалып отырған жоқ. Бір жеңнен қол, бір жағадан бас шығара қимылдап жатыр.
Қанат БІРЖАНСАЛ
