Ит асырап, қылмыстың алдын алуға үйрету – кинолог мамандардың қызметі. Ауа райының қолайсыздығына қарамай итті ізге салып, қылмыскерді табу оңай шаруа емес. Жуырда ҚР ҰҚК шегара қызметі Жетісу облысы бойынша департаментіне қарасты Алакөл аудандық шегара басқармасында күн-түн демей ел тыныштығын күзеткен кинологтар арасында жарыс өтті.
Шараның мақсаты – мамандардың кәсіби шеберлігін жетілдіру, қызметтік иттердің дайындық деңгейін көтеру, жаңа әдіс-тәсілдерді меңгеру және тәжірибе алмасу. «Қызметтік иттердің ең үздік маманы» атты сайысқа «Достық» шегаралық бақылау бөліміне қарасты шегаралық бақылау бөлімшелерінің саққұлақтары қатысты. Кинологтардың қызметтік иттері кедергілерден өту, көлік құралдарын, бөлме, қол сөмкені, адамды тексеру сияқты сынақтарға түсті. Бұл – кинологтар арасында кәсіптік шеберліктерін жетілдірудің бір жолы.
Жарыс кезінде дайындықтарының жоғары екенін көрсеткен қызметтік иттер нұсқаушылардың пәрменін бұлжытпай орындап, есірткі мен жарылғыш заттарын оңай тауып жатты. Жарыс қорытындысы бойынша І орын сержант Досжан Көшегеновке бұйырды. ІІ орын мен ІІІ орынды сержант Жарқын Құсманов пен кіші сержант Фархад Жәнібеков бөлісті.
ӨЗ ТІЛШІМІЗ
