Мың өліп, мың тірілген қазақ халқы небір зұлмат кезеңді бастан өткерді. Оны елдің санасынан өшіріп тастау әсте мүмкін емес. Тарихта қанмен жазылған қасіретті күндерді ақын-жазушылар қаламына арқау ету арқылы шындықты жаңаша сипаттауда. Соның бірі Халықаралық «Алаш» әдеби сыйлығының лауреаты Ғалым Жайлыбай.
Ақынның «Қара орамал» атты поэма-реквиемі қалың оқырманға ерекше әсер сыйлағаны анық. Оқып отырып та көзге жас үйіретін шығарманы сахна төрінде қойылым түрінде көру жүрекке басқаша салмақ салады. Саяси қуғын-сүргін және ашаршылық құрбандарын еске алу мен Халықаралық балаларды қорғау күні қарсаңында Талдықорған қаласының Оқушылар сарайында дәл осы туында көрерменге тағы бір мәрте жол тартты. Бірнеше жыл бұрын автордың өзі қатысуымен тұсауы кесілген қойылымға талдықорғандықтар тәнті болған.
Осы жолы да «Жас актер» үйірмесінің таланттары актерлік шеберліктері арқылы Қарағанды лагері тұтқындарының жан айқайын, тартқан тауқыметін бейнеледі. Әсіресе, таяқ жеп, шыр-пыр болған балалар мен әйелдердің зарлы үні құйқаңды шымырлатады. Қойлым режиссері Қазақстанның еңбек сіңірген қайраткері Кендебай Темірбайұлы, көркемдік жетекшісі ҚР Халық әртісі Алмахан Кенжебекова және дыбыс режиссері Қарлығаш Исаева оқушыларды әртүрлі образда шығарып, киім киістері, жүріс-тұрыстарын ерекшелеп, өлеңді жан-тәнімен оқуға әбден бейімдегені байқалды. «Сұламадан алып қалған сұлатпай, Аналарым қолдан сыққан құрт еді» деп тұтқындарға тас емес, құрт лақтыру арқылы бауырмалдық танытқан қазақ халқының достық пейілі көрермен көңілін тебірентті.
Талай жыл үйірмеде шәкірт тәрбиелеп келе жатқан өнер иелері осы секілді тың туындыларды сахналауға үлкен күш жұмсап жатқандарын айтады.
Барлығыда жанып тұрған балалар. Шәкірттеріміздің алды Т. Жүргенов атындағы Қазақ Ұлттық өнер академиясына оқуға түсіп, өмірін театрмен байланыстырып жатыр. Тәуелсіздіктің 30 жылдығы, Семей полигоны, Мұқалғаи Мақатаевтың шығармашылығына арналған қойылымдарды да әзірлеп жатырмыз. Қазақ руханиятына аянбай еңбек етіп, ақын-жазушылардың шығармаларын жаңаша жандандыру үшін тер төге бермекпіз, – деген Кендебай Темірбайұлы барлық мүмкіндікті туғызып отырған Оқушылар сарайының басшылығына ерекше алғыс білдірді. Өз кезегінде мекеме директоры Ләззат Есболова Оқушылар сарайының ашылғанына 5 жыл толғанын, әртүрлі үйірмелер арқылы оқушылар білімдерін жетілдіріп жатқанын айтып, Кендебай Темірбайұлы, Алмахан Кенжебекова мен оқушылардың ата-аналарына ыстық ықыласын білдірді.
Мәулен ӘНЕРБАЙ
