Облыстық кәсіпкерлер палатасы өткен жылы жалпы сомасы 1,2 млрд. теңгеге кәсіпкерлердің құқығын қорғады. Бұл туралы өңірлік палатаның директоры Әсет Шаяхметов мәлімдеді.
Оның айтуынша, бизнестің түйткілді мәселелерінің қатарында мемлекеттік сатып алулар мен жер қатынастары саласы, мемлекеттік органдардың іс-әрекеттеріне шағымдар, салық, агроөнеркәсіптік кешен саласындағы мәселелер бар.
– 2020 жылы палатаға кәсіпкерлердің құқықтарын қорғау желісі бойынша заңды тұлғалардан 233 өтініш келіп түсті, оның 88-і оң шешімін тапты. Жалпы, біздің қолдауымыздың арқасында бизнес құқығы 1,2 млрд. теңгеге қорғалды, бұл алдыңғы жылмен салыстырғанда екі есеге жоғары, – деп атап өтті Әсет Шаяхметов.
Мәселен, былтыр кәсіпкерлер палатасының өкілдері сотта «АЛСАД Қазақстан» ЖШС құқығын қорғап, сотқа үшінші тұлға ретінде қатысты. Компания соттан мемлекеттік органның әрекетін заңсыз деп тануды және өткен жылғы наурыздан мамырға дейін тағамдық тауық жұмыртқасы өндірісінің құнын арзандатуға өтінімдер қабылдау және субсидиялар төлеу арқылы бұзылған құқықтарды қалпына келтіруді талап етті.
Азаматтық істі қарау қорытындысы бойынша сот кәсіпорынның 56 млн. теңге көлеміндегі талап-арызын қанағаттандыру туралы шешім шығарды. Сонымен қатар, палата сарапшыларымен 243 нормативтік-құқықтық актілер қаралды, олардың 57-і ескертулермен, 79-ы ескертулерсіз, 107-інің кәсіпкерлер мүдделеріне қатысы жоқ.
Айгүл БАЙЖҰМАҚЫЗЫ
