Қыстың қамын жазда ойлайтын ағайын бұл жолы да жылдағы тірлігіне ерте кірісіп кетті. Бұл күндері барлық санаттағы шаруа қожалықтарында мал қыстату науқаны жүріп жатыр.
Қаратал аудандық ауылшаруашылығы бөлімінің берген мәліметіне сүйенсек, өңірде мал қыстатуды қалыпты өткізу үшін биыл 107 200 тонна шөп, 40 000 тонна сүрлем, 27 200 тонна сабан және 13 500 тонна жемдік азық дайындалған. Жалпы, аудан бойынша 39 063 мүйізді ірі қара малы, 101 067 бас мүйізді ұсақ мал, 8 428 бас жылқы бар.
– Мал қыстату науқанына дайындық ойдағыдай жүргізілді. Аудан бойынша 79 қыстақтағы төрт түлікке қажетті жемшөп қоры жеткілікті мөлшерде әзірленді. Шалғай қыстақтарға баратын жол жақсы, шаруалар азық-түліктен тарықпайды. Малсақ жандар қыстан қысылмай шығу үшін барлық жағдай жасалды, – дейді аудандық ауылшаруашылығы бөлімінің бас маманы Қанабек Намазбаев.
Шалғайда жатқан Бәйшегір ауылдық округіндегі «Тоғайбаев Жолдасбек» шаруашылығының мал қыстату науқанына әзір екені байқалды. Өмір бойы мал бағып, төрт түліктің қыр-сырын жақсы білетін малшы Қуаныш Бұлажанов қыстан еш тарықпай, көктемге дейін күйлі қылып шығару үшін қажетті жемшөп қоры жеткілікті екенін айтты. Шаруашылықта 210 бас ірі қара, 50 бас жылқы малы қыстайды.
– Мал қыстатуға қажет 500 дана орама шөп, 4 500 түк, 20 тонна жем дайындалды. Ересек мал күні бойы жайылады. Кешке жемшөп береміз. Қорада 60-70 тана-торпақ қана тұрады. Жас малды өріске жібермейміз. Су жаңа үш тракторымыз бар. Шөп тасу, мал суғару еш қиындық тудырмайды. Қыстақта жарық бар, ауызсу да қолжетімді, – дейді Қуаныш Бұлажанов бізбен әңгімесінде.
Осылайша, ауданда мал қыстату науқаны ойдағыдай жүріп жатыр. Малсақ жандар ала жаздай еңбек етіп, жинаған жемшөбінің арқасында қыстан аман-есен шығатынына сенімі мол.
Асхат ӨМІРБАЕВ
Қаратал ауданы
