Биыл Тәуелсіздігіміздің 30 жылдығы. Бұл ата-бабаларымыз армандаған қазақ мемлекетінің қайта өркендеуі мен бостандыққа ие болуының маңызды кезеңі. Тарихтың өлшемі бойынша 30 жыл – бұл бір ерекше үлкен мәртебелі сәт. Алайда көптеген халықтар үшін бұл кезең қиындықтар мен жеңістерге, дағдарыстар мен жетістіктерге толы жылдарды қамтыды. Біз бұны да бастан өткеріп жатырмыз.
Тәуелсіздіктің отыз жылын шамамен үш онжылдыққа бөліп қарастыратын болсақ, бұл кезеңдердің әрқайсысының өзіндік ерекше тарихи маңызы бар. Алғашқы онжылдықты Тәуелсіздіктің іргесін қалаған жылдар деп айтар едім. Елбасының басшылығымен мемлекеттік рәміздер бекітілді, Ұлттық теңге енгізілді. Еліміздің Ата Заңы қабылданды. Шет мемлекеттермен дипломатиялық қатынас орнады. Қарулы Күштер құрылып, тиімді билік жүйесі қалыптасты. Қазақстан беделді халықаралық ұйымдардың мүшесі болды. «Қазақстан – 2030» Стратегиясы қабылданды. Көрші елдермен мемлекеттік шегара анықталып, қарқынды келіссөздер нығая түсті. Ядролық қарудан бас тартып, қарусыз азат мемлекетке айналдық. Экономика нарықтық бағытқа ауысып, жекеменшік институттар шоғырланып, отандық бизнестің дамуына негіз қаланды. Жастарымыз әлемнің жетекші университеттерінде оқи бастады. Ұлттық қор құрылып, оның резервтері кейінірек бізге бірнеше дағдарыстан аман-есен шығуға көмектесті. Біз әлемнің түкпір-түкпіріндегі қандастардың қоныстануына жағдай жасай отырып, тарихи Отанына оралуға мүмкіндік бердік. Нәтижесінде еліміз қайта жандана бастады, ұлттық рух оянды.
Екінші онжылдық – мемлекеттілігіміздің көкжиегін кеңейту кезеңі. Осы жылдар ішінде елдің позициясы едәуір нығайып, әлемдік діндер съезін өткізу туралы бастама көтерілді, экономикалық әлеует өсті. Теңіздің жоғалып кетуіне жол бермей, Солтүстік Аралды тірілттік. Еуропадағы Қауіпсіздік және ынтымақтастық ұйымының саммитін өткізіп, өзге де біршама халықаралық жобаларды іске асырдық. «Мәдени мұра» бағдарламасымен тарихымыздың ақтаңдақ тұстарын қайта қарастырдық. Шетелден инвестиция құйылып, Есілдің жағасында салынған жаңа астана ұлттық нышанға айналды. Үй мәселесі бойынша құрылыс қарқынды жүріп, ірі инфрақұрылымдық жобалар іске қосылды.
Үшінші онжылдықта дамуымыздың биік белестеріне қол жеткіздік. Мемлекеттік шегараға қатысты барлық мәселелерді түпкілікті шешіп, әлемнің дамыған отыз елінің қатарына кіру мақсаты көрсетілген «Қазақстан – 2050» Стратегиясы қабылданды. Сонымен қатар, Елбасымыз егеменді еліміздің рухани жаңғыру аясына ерекше назар бөліп, саяси реформалар мен экономикалық жүйені жаңғыртты. Үдемелі индустриялық-инновациялық даму бағдарламасы, «Нұрлы жол» және «100 нақты қадамды» қоса алғанда, әртүрлі салада өзекті бағдарламалар жүзеге асырылды. Осы жетістіктердің бәрі Елбасы көрегендігінің, халқымыздың береке-бірлігінің, отандастардың тынымсыз еңбегінің арқасында жүзеге асты.
Төртінші онжылдықтың негізгі мақсаттары – мықты мемлекет және бәсекеге қабілетті ұлтты нығайту. Ол үшін бізге саяси және экономикалық реформалар мен қоғамдық сананы жаңарту процесін жалғастыру, уақыттың сын-қатерлеріне бейімделген сапалы жаңа ұлттық бірегейлік қалыптастыру қажет. Осындай жетістіктерді әрі қарай жалғастырып, дамыту, өркендету, әділетті қоғам мен тиімді мемлекет құру барша халықтың міндеті.
Аслан ҒАБДУЛЛИН,
«Азаматтарға арналған Үкімет» мемлекеттік
корпорациясы» КЕАҚ облыстық филиалының директоры
