Түргендегі қазақ мектебінің тарихы еліміздің егемендігімен тамырлас. Олай дейтінім, бұл білім шаңырағының ірге тіктеуі 1994 жылдың күзінен бастау алады. Сол жылдары ауылдағы ұлтжанды азаматтардың көшін бастаған Абыхан Жексембековтың бел шешіп араласуымен бой көтерген мектеп қазіргі таңда аудандағы ең іргелі, байырғы білім ошақтарымен иық теңестіре алатындай дәрежеде.
Аталмыш мектеп Абыхан Жексембеков атымен аталады. Оның материалдық-техникалық базасы нығайған, оқу ғимаратына күрделі жөндеу жүргізілген, сынып кабинеттері жарық әрі жылы. Заман талабына сай модификациялық үлгіде физика, информатика, мультимедия кабинеттері жабдықталған. Осының нәтижесінде жыл сайын физика, информатика, ағылшын тілі пәнін таңдап, жоғары оқу орны гранттарын жеңіп алған түлектер саны артуда.
2018-2019 оқу жылында «Цифрлы Қазақстан» кешенді бағдарламасын жүзеге асыру мақсатында Абыхан Жексембеков мектебінде «заманауи мұғалімдер бөлмесі» жабдықталды. Заманауи үлгідегі мұғалімдер бөлмесінің концепциясы жасалып, әдістемелік кеңесте педагогикалық ұжымда талқыланды. Кабинетте мұғалімдердің жан-жақты шығармашылықпен жұмыс істеуіне және бос уақыттарында демалуларына толық мүмкіндік жасалған. Заманауи үлгідегі жиһаздармен, интербелсенді тақтамен, интернет желісіне қосылған моноблогтармен және әдістемелік көмекші құралдармен жабдықталды. Заманауи үлгідегі мұғалімдер бөлмесінде ұстаздарымыз интернет желісі арқылы республикамыздағы әріптестерімен тәжірибе алмасып, онлайн сабақтарға қатысып, ата-аналар мен балаларының оқу үлгерімі жайлы мәлімет алмасып отырады.
«Еңбегімен ер сыйлы» демекші, А. Жексембеков орта мектебі ұжымы үшін Абыхан Аманбайұлы болашаққа жол сілтеген, «қазақ» деген қасиетті ұғымды ту еткен ұстаздардың ұстазы іспеттес. Ол кісінің есімі жылдар жылжыған сайын дараланып, көктегі жарық жұлдыздай айқындала түседі. Бүгінде онымен қызметтес, дәмдес болған замандастары ел басқарған жайсаң жанды сағынышпен еске алады. Абыхан Аманбайұлының мол адамдық қасиетін, терең білімділігін, біліктілігін, іскерлігін, ұлтжандылығын, ақылдылығын, қарапайымдылығын, парасаттылығын, көсемдік кемеңгерлігін кім толқымай еске алмайды дейсіз?! Ол кісі билік тізгінін ұстаған жылдары Түрген ауылының игілігіне, өсіп-өркендеп қалыптасуына, халықтардың әл-ауқатының түзелуіне, өнер мен білімнің кемелденуіне, ұлттар бірлігінің тұтастығына, жер-суы, шөбінің мұқият беріктігіне өзінің бар өмірін, күш-қайратын аямай жұмсаған сақи саңлақтың ардақты есімін артында қалған ел-жұрты мақтанышпен айтады. Сол тәуелсіздік алған алғашқы жылдары елім-жерім деп Отанына көшіп келген қандас бауырларымыздың орнығып, тұрғылықты халыққа сіңісіп кетулеріне шынайы қолғабысын беріп, көпбалалы отбасыларына сауын сиырға дейін бергенін бүгінде олар сағынышпен еске алады. Елі үшін еңбек еткен абзал азамат, үлкен жүректі, халқының шынайы жанашыры болған, ел-жұрты қадір тұтқан Абыхан Жексембеков есімі кейінгі ұрпақ санасында мәңгі жасайтыны анық.
Жыл сайын ақпан айында туған күніне орай ұйымдастырылатын тәрбие сағаттары мен келелі шараларда Абыхан Аманбайұлының өнегелі өмірі мен қайсар рухын, елін сүйген патриоттығын насихаттау арқылы бүгінгі ұрпаққа сүбелі тәрбие беру дәстүрге айналған. Бұл үрдіс биыл да өз жалғасын тапты. Абыхан Аманбай- ұлының азаматтық тұлғасы бүгінгі және келешек ұрпаққа өлмес өнеге.
Ғазиза Еспембетқызы,
А. Жексембеков орта мектебінің қазақ тілі мен әдебиеті пәні мұғалімі
Еңбекшіқазақ ауданы
