Елі үшін ерен еңбек етіп, артына өшпестей із қалдырған жандар аз емес. Солардың қатарында марқұм Үсенбай ата Тастанбековтың есмін даралап айтуға болады. Жүз жасаған абыз қарияның қажымай-талмай жүріп атқарған еңбегі ел-жұртының есінде.
Үсенбай Бақтиярұлы Ұлы Отан соғысына қатысып, қан майданнан мүгедек болып оралған. Бірнеше жауынгерлік орден, медальмен марапатталған. Бейбіт өмірде де берекелі іс атқарып, қоғамдық жұмыстарға белсене араласқан.
Ол кісі Алматы облысындағы Жамбыл, Қарасай және Еңбекшіқазақ аудандық газеттерінің редакторы болып, аталған аймақтардың өсіп-өркендеуіне, дамуына өзіндік үлес қосты. Сонымен қатар, Қаскелең аудандық партия комитетінің нұсқаушысы, мектеп мұғалімі болып та қызмет істеп, басқару ісіне, жас ұрпақ тәрбиесіне араласты.
Үсенбай Бақтиярұлы елімізде алғашқылардың бірі болып аудандық «Қазақ тілі» қоғамын құрып, ұзақ уақыт оны байыпты басқарды.
Ол тұста ауданда бір-ақ қазақтілді мектеп болған. Үсекең алдымен қазақ мектептерінің санын арттыруға бар күшін салды. Басшыларға тайсалмай кіріп, мәселенің оң шешілуінде табандылық танытты. Нәтижесінде бірталай мектеп қазақ тілінде оқытуға көшті.
Ендігі бір жұмысы – атауы орысша көшелерді қазақшалау болды. Онда да сол көшелердің ұлтымыздың ұлы тұлғалары мен осы ауданға еңбегі сіңген адамдардың есімімен аталуын алдына мақсат етіп қойды. Ол тілегі орындалып, көшелерге талай асыл азаматтың есімі берілді.
Үсенбай ата ел мен жер тарихына жетік, ұлттық салт-дәстүрді жақсы білетін нағыз шежіре қарт еді. Қарасайлықтар абыз қария атанған атамыздың өзі мен сөзін әлі күнге дейін жыр ғып айтады.
Иә, Алматы облысының және Қарасай ауданының Құрметті азаматы, Қазақстанның Құрметті журналисі, 100 жасаған Үсенбай Тастанбековтың еліне сіңірген еңбегі зор. Ендеше ол кісінің есімі Қарасай ауданындағы өзінің туған ауылы Батандағы және Жамбыл ауылындағы №2 орта мектептерге берілсе деген ұсынысымыз бар. Бұл 2019 жылы өмірден өткен, халық үшін қалтқысыз қызмет еткен жанның рухына көрсетілген үлкен құрмет болар еді.
Едіген ЖҮНІСБЕКОВ,
Қарасай аудандық ардагерлер кеңесінің төрағасы
