Еліміздің қазба байлығы тани білген адамға көптеген жақсылықтың, түгесілмес байлықтың бастауы іспетті. Бір ғана тастың өзінен құрылысқа қажетті көптеген нәрсе өндіріледі. Мұның дәлелін Текелі қаласында орналасқан «Art-KZ» жауапкершілігі шектеулі серіктестігінен көруге болады.
Мәрмәр тасты уатып, құрғақ құрылыс қоспаларына қажетті ұн өндіретін кәсіпорын еліміздің барлық өндіріс орындарына шикізат дайындайды. Атап айтқанда, бір ғана Текелі қаласындағы 6 кәсіпорын еліміздегі мәрмәр ұнтағының 80%-ын өндіреді. Осының өзі тау етегіндегі моноқаланың экономикалық әлеуетін көрсетсе керек. 2008 жылы құрылған «Art-KZ» жауапкершілігі шектеулі серіктестігінің атқарушы директоры Евгений Майерленің айтуынша, құрылыс материалдарына, фармацевтикаға, бояу өндірісіне кеңінен қолданылатын мәрмәр ұнтағы негізінен шет мемлекеттерден әкелініпті. Бүгінде Алматы және Жетісу облыстары мен Нұр-Сұлтан, Қарағанды сынды өндірісті қалалардан тапсырыс қабылдайтын серіктестік айына 15 мың тонна шикізат өндіріп, 300 тонна дайын құрғақ қоспаны сатуға шығарады.
– Біздің мәрмәр ұнтағымыз көпшілікке кеңінен танымал «Белоснежка», «Радуга», «Selena» сынды бояулар мен «AlinEX» брендінің өнімдеріне қосылады. Осыған орай қазір дайын құрғақ қоспалар өндіруге кірістік, – дейді жауапкершілігі шектеулі серіктестіктің атқарушы директоры Евгений Эмилұлы. – Өз қаржымызға қажетті құрылғыларды жаңартқанымызға 3 жыл болды. Мемлекеттен қолдау алып, несиеге кірген жоқпыз. Жұмыссыздықты жоюға үлес қосып отырмыз. Бірақ бір қызығы, қазір көпшілік ауыр жұмыстан қашады. Айына 220 мың теңгеге жуық жалақы қойғанымызға қарамастан белсеніп еңбектенгісі келетін жұмысшы таба алмай отырмыз. Тап қазір тас диірменін жүргізетін 15 адамды қабылдауға дайынбыз. Зауыттағы 3 бригадаға кезекпен келгенде бір жұмыскер айына 15 күн еңбек етеді. Жылдық еңбек демалысы 30 күнге тең. Жұмыскер жалақысының 5%-ы қосымша зейнетақы салымына аударылып тұрады. Өзіміздің карьеріміз бар. Мәрмәр ұнтағын шығаратын зауыттың өзінде 50 адам тұрақты жұмыспен қамтылса, жалпы мәрмәр өндірісінде 500 жұмыс орны құрылған.
Кәсіпорын басшысының сөзіне қарағанда қазіргі жастардың басым бөлігі ауыр еңбектен гөрі интернетке «тик-ток» түсіріп, блогер болғанды қалайды. Сол себепті, жас ұрпақты ауыр еңбекке үгіттейтін, қиындықтан қашпауға шақыратын насихат шаралары керек. Жасы 72-ні еңсерген Евгений Майерле өскелең ұрпақтың тәрбиесіне алаңдайтынын осылайша білдірді.
Жалпы, Текелі қаласындағы өндіріс өнімдерінің облыстағы үлесі 13,1%-ды құрайды. Биыл жыл басынан бері өңір экономикасына 2909,6 миллион теңге құйған моноқалада тіркелген 1500-ден астам шағын және орта кәсіпкерлік нысаны 7 айдың ішінде 6425,0 миллион теңгенің өнімін өндірген.
Мәди АЛЖАНБАЙ
