Оқушылар сарайында Назарбаев Университетінің Астанадан келген арнайы өкілдері Талдықорған қаласындағы мектептердің 2018 жылғы түлектерімен кездесті. Мамандар Назарбаев Университетіне оқуға түсу үшін қойылатын талаптармен таныстырып, жастарға емтиханалды даярлықтар туралы әңгімеледі.
Назарбаев Университетіне қабылдау үш сатыдан тұрады. Талапкерлер ең бірінші Британ кеңесінің ғылыми қызметкерлерімен бірлесіп дайындалған сынақтан өтеді. Сонымен бірге, ағылшын тілін меңгеру деңгейін анықтайтын IELTS бойынша тест тапсырады.
Университет есігі барлық талапкерлерге ашық. Айта кетейік, біздің елде Назарбаев Университетіне тек Назарбаев зияткерлік мектебін бітірген түлектер ғана түсе алады деген түсінік қалыптасқан. Астанадан келген өкілдер ондай түсініктен арылу қажеттігін алға тартып, білімді адамға кез келген жерде кедергі болмайтынын айтып өтті. Үш сатылы сынақтан сүрінбей өткен түлектер Назарбаев Университетінде еш алаңсыз оқуын жалғастырады әрі шетелдік профессорлардан ағылшын тілінде дәріс алады.
Бүгінгі таңда Назарбаев Университетінде 4100 студент оқып жатыр. Университеттің оқытушылар құрамы – 400 адам. Олардың 70 пайызы шетелдің ең үздік университеттерінен келген профессорлар. Мейлі, мектеп-гимназия, мейлі, лицей түлектері болсын, ағылшын тілін терең меңгерген талапкер аталған оқу ордасында жаратылыстану бағытында жоғары білім алып шығады. Сонымен бірге, ауыл мен қалада мектеп бітіргелі отырған түлектерге емтихан талаптары тең.
Назарбаев Университеті ең озық ойлы талапкерлерді оқуға шақырады. Мұнда студенттер заманауи білім алып қоймай, кәсіби білікті әрі бәсекеге қабілетті маман болып қалыптасады.
ӨЗ ТІЛШІМІЗ.
