«Nur Otan» партиясының сайлауалды бағдарламасына сәйкес алдағы уақытта Жетісу жерінде фармацевтикалық өнім шығаратын және ет өңдеу зауыты салынбақ. Одан бөлек, Ұйғыр ауданында жылына 26 мың тонна өнім беретін құс фабрикасы да бой көтеріп, «Қорғас–Шығыс қақпасы» АЭА аумағына және «Қорғас» шекара маңы ынтымақтастығы халықаралық орталығына инвестор тарту барысында құны 353,4 млрд. теңгенің 61 жобасын жүзеге асыру жоспарланған.
Осы сынды жоспарларды сөз еткен облыстық мәслихат депутаттығына үміткер Гүлмира Ахметова қызмет көрсету саласының өкілдерімен «ZOOM» бағдарламасы арқылы кездесті.
– Қоғам дамуына кедергі келтіретін жалғыз ғана мәселе бар. Ол – жұмыссыздық. Партия осы мәселені шешуге білек сыбана кіріспек. Мәселен, сайлауалды бағдарламаға сәйкес партия алдағы бес жылдықта 51 ілгері инвестициялық жобаны іске асырмақ. Келер жылы Ілияс Жансүгіров ауылында тәулігіне 500 тонна өнім беретін қант зауытын салады. Одан бөлек, Ақсу ауданында табиғи каучук өндіру зауытын, жылдық қуаты 3,3 миллион тонна болатын кен өңдеу зауытын салу жоспарланған. Ірі өндірістердің ашылуы тек экономикаға серпін болмайды, жаңа жұмыс орындарының ашылуына септеспек, – деген үміткер «Nur Otan» партиясы облыс аумағында экономиканың басым салаларын, оның ішінде өнеркәсіпті, агроөнеркәсіп кешенін, құрылыс пен туризмді дамыту арқылы халықтың өмір сүру деңгейін жақсартатынын, тұрғындардың жақсы табыс табуы үшін жұмыс орындары көптеп ашылуы керектігін атап өтті.
Жалпы, жақсы табыс – жайлы өмір кепілі. Ал жұмыссыздық оған кедергі болуда. Партия өңірде алдағы уақытта мемлекеттік бағдарламаларды жүзеге асыру нәтижесінде 69,9 мың адамды жұмыспен қамтуды көздеп отыр.
М. АСЫЛ
