Қонаев қаласы Алматы облысының орталығы атанғалы жаңаша түрленіп, көркейе түсті. Қала халқы мен алыс-жақыннан келетін қонақтар үшін маңызды саналатын автокөлік жолдары біртіндеп ретке келтіріліп, жөнделіп жатыр. Көшелерде жаяу жүргіншілер де көбейді.
Қонаев қаласындағы 213,81 шақырым жолдың 189,6 шақырымы жақсы, 13,36 шақырымы қанағаттанарлық, қалғаны қанағаттанарлықсыз жағдайда. Биыл қаланың жалпы ұзындығы 3,61 шақырымдық 3 көшесі орташа жөндеуден өтуде. Шаһардағы автокөлік жолдарының біразында жаз бойы құрылыс жұмыстары жүрді. Нәтижесі жаман емес. Бүгінде оқтай түзу жолдармен жүйткіген автокөлік иелері бұған дән риза. Сонымен бірге қалаішілік автокөлік жолдары мен жаяу жүргінші өткелдеріне және велосипед жолдарына жол жолақтары жүргізілді.
Жол жүру тәртібін автоматты түрде ретке келтіріп отыратын бағдаршамды күтіп ұстау жұмыстары да жоспарға сәйкес жүргізіліп, тіректері боялды. Жалпы, қала бойынша 15 бағдаршам бар. Олардың Қонаев – Абай, Центральная – Сейфуллин, Құрылысшы – Әуезов, Қонаев – Қойшыманов көшелері қиылысындағы бағдаршамдардың 4-уі дыбыстық сигналдармен жабдықталған.
Жол белгілері қауіпсіздікті сақтайды. Осы ретте аймақта барлығы 1106 жол белгілері орнатылған. Соның 874-і Қонаев қаласында. Қалғаны Шеңгелді және Заречный ауылдық округтері мен «Алматы-Демалыс» демалыс аймағында.
Қонаев өңіріндегі мектеп және мектепке дейінгі мекемелердің айналасына 36 пано, 38 жасанды жүргіншілер макеті қойылған. Оның ішінде қала бойынша 20 пано, 20 жасанды оқушы бейнесінің макеті орнатылған. Адам өмірінің қауіпсіздігін сақтау мақсатында мектептер мен мектепке дейінгі мекемелер және аурухана, базар сияқты адам көп қатынайтын жерлерге жаяу жүргіншілерге арналған өткелдер техникалық реттеу құралдарымен толық жабдықталған. Автокөлік жолдарының жағдайын жақсарту мақсатында ой-шұңқырлар тегістеліп, жөндеу жұмыстары жүргізілді.
А. Байжұмақызы
Қонаев қаласы
Алматы облысы
