Бұл шара әр аудан мен қос қаладан дүбірлі додаға қатысқан өнер иелерін тамашалаумен ғана шектелмеді. Соларға деген ерекше қолдаудың куәсі болдық. Әуелі Ілияс Жансүгіров атындағы Мәдениет сарайының алдында тұрған 14 аппақ «темір тұлпар» көптің назарын өзіне аударды. Бұған дейін дәл сол алаңнан «Жедел жәрдем», МАИ қызметкерлеріне, басқа да сала мамандарына арналған оннан аса көліктің кілті табысталғанына куә болғанбыз. «Бұл ән бұрынғы әннен өзгерек» дегендей, бұл жолғы құрмет өнер майталмандарының төбесін көкке тигізгендей әсер етті. Себебі, бір күнде мәдениет қызметкерлеріне осынша көліктің кілтін табыстау ел тарихында алғаш рет жасалып отыр десек, асыра айтқандығымыз емес. Жоғарыда қозғағанымыздай, желтоқсанның ызғарында бой жылытып, ой сергіткен сәт болды. Бұл – тәуелсіздіктің тартуы еді!
Әсері бөлек мәдени шарада облыс әкімінің орынбасары Диас Есдәулетов Тәуелсіздіктің баянды болуы елдің рухани негізінің беріктігіне байланысты екенін атап өтті. Мәдениет – ұлттық болмысты сақтайтын, ұрпақтар сабақтастығын жалғайтын маңызды сала екеніне тоқталды. Сондықтан мәдениет қызметкерлерінің еңбегін нақты іспен қолдау – мемлекеттік саясаттың басым бағыттарының бірі десек те болады.
– Жетісу облысы құрылғаннан бері мәдениет саласының инфрақұрылымын жаңарту 40 пайыз шамасында, бюджеті 83 пайызға өсті. Соңғы 3 жылда сала мекемелерінің материалдық базасын нығайтуға бюджеттен 1 млрд. теңгеден астам қаражат бөлініп, музыкалық аспаптар, сахналық киімдер, компьютерлік жабдықтар, басқа да қажеттіліктер сатып алынды. Оған қоса, мәдениет саласының техникалық базасы бүгін шағын автобустармен және жүк көліктерімен толыққалы отыр.
«Ел іші – өнер кеніші» дегендей, өнер адамдары үнемі халық арасында, көптің алдында жүреді, әрдайым ізденісте болып, ел-жер аралайды. Сондықтан бұл көліктер мәдениет ұжымдарының гастрольдік сапарларға шығуына, қажетті құрал-жабдықтар мен декорацияларды тасымалдауына, түрлі фестиваль, байқауға қатысуына мүмкіндік туғызып, жұмыс сапасына оң әсер етеді деп сенеміз, – деген Диас Рахметұлы салтанатты шарада тек көліктер берумен ғана шектеліп қоймай, екінші жыл қатарынан өткізіліп келетін «Жер жаннаты – Жетісу» тележоба байқауына белсене қатысып, өнер көрсеткен өңірлер де марапатталатынын тілге тиек етті.
Мұнан кейін салтанатты түрде Жетісу облысының 8 аудандық және 2 қалалық Мәдениет үйлеріне, сондай-ақ, Сәкен Сейфуллин атындағы әмбебап кітапханасына, Көркемсурет галереясына, облыстық мемлекеттік архивке және Халық шығармашылығы орталығына тиесілі көліктердің кілті табыс етілді. Иесін тапқан әрбір көлік мәдениет саласы қызметкерлерінің жұмысын жүйелеуге, шығармашылық ұжымдардың шалғай елді мекендерге уақтылы баруына және мәдени шаралардың қолжетімділігін арттыруға мүмкіндік бермек. Сап түзеген «темір тұлпарларды» шығарып салған жұрт Құлагер ақын атындағы Мәдениет сарайына кірді. «Жер жаннаты – Жетісу» тележоба байқауының қорытынды кезеңін ашқан облыс әкімінің орынбасары Диас Есдәулетов жиналған қауымға жылы лебізін білдіріп, байқау жеңімпаздарын диплом және қаржылай сыйлықтармен марапаттады. Атап айтсақ, арнайы жүлде және 300 мың теңге ақшалай сыйлық Қаратал ауданына, III орын және 500 мың теңге ақшалай сыйлық Сарқан ауданына, II орын және 700 мың теңге ақшалай сыйлық Ақсу ауданына бұйырды. Ал I орын және 1 миллион теңге ақшалай сыйлыққа Кербұлақ ауданы лайық деп табылды. Тележоба байқауының бас жүлдесі және 5 миллион теңге қаржылай сыйлықпен Көксу ауданы марапатталды.
Марапаттан кейін рухани шараның гала-концерті басталды. Жоба ережесіне сай әр номинация бойынша жеңімпаздар өнер көрсетті. Халық әндері мен заманауи эстрада жанрындағы әуезді әндер, термешілердің тағылымды толғауы, ұлттық би әлемі, айтыс ақындарының арнауы алма-кезек ауысып отырып көрерменнің көңіл көкжиегін кеңіткен әдемі кешке ұласты.
Қорыта келгенде, бұл байқау Жетісуда руханиятқа деген көзқарастың жаңа деңгейге көтерілгенін көрсетті. Ұлттық мәдениетті қолдау нақты іспен бекітілгенде ғана өз нәтижесін беретіні осы жолы айқын байқалды.
Жұматай ӘМІРЕ
