Алматы қаласымен іргелес орналасқан Қарасай ауданында халық саны жылдам өсіп келеді. Оны осы аймақтағы оқушы санының артуынан да анық байқауға болады.
Мәселен, ауданда 55 мектеп бар. Оның 48-і орта, 3-уі бастауыш, 3-уі жекеменшік, біреуі арнаулы гимназия. Бірінші қыркүйекте осы мектептердегі 1-11-сынып оқушыларының саны 72550 болды. Салыстырар болсақ, өткен оқу жылында ауданда 66531 оқушы білім алған. Бұл аймақтағы бала саны 6019 оқушыға артқанын көрсетеді. Білім беру мекемелеріне деген сұраныс жылдан-жылға өсіп, соған сай өңірде жыл сайын мектеп салу, бұрынғыларын кеңейту жұмыстары тұрақты жүзеге асырылу үстінде. Халықтың өсіміне, көші-қонға байланысты жергілікті атқарушы билік алдағы жылға жаңа оқушы саны қаншалық боларына болжам жасайды. Қарасай ауданында мұндай болжам бойынша мектеп табалдырығын алғаш аттаған бүлдіршіндер саны алдын ала күтілген межеден анағұрлым асып кетті. Жаңа оқу жылына мұнда 1-сыныпқа 7500 оқушы қабылдау жоспарланған еді, ал 1 қыркүйектегі жағдай бойынша 8237 ата-анадан өтініш түсіп, осынша бала мектеп табалдырығын алғаш аттады.
Мұндай демографиялық дүмпу ірі мегаполистің маңындағы барлық ауданға тән. Бұл, әрине, еліміздің дамуындағы оң үрдіс. Осындай жақсылықтар мектептердің үшауысымдық оқу үрдісіне көшуі тәрізді мәселелерді туындатуы заңдылық. Жаңадан білім беру ғимараттары салынып, ондағы үш ауысым тәртібі бірте-бірте жойылып жатса, енді бірінде жаңадан алдан шығары сондықтан.
Серік САТЫБАЛДИЕВ
