Президент Қасым-Жомарт Тоқаев Чехия Премьер-министрі Андрей Бабишті І дәрежелі «Достық» орденімен марапаттады, – деп хабарлайды 7-su.kz ақпараттық порталы.
Мемлекет басшысы жоғары мемлекеттік награда Чехия мен Қазақстан арасындағы стратегиялық серіктестікті нығайтуға қосқан елеулі үлесі үшін табысталғанын атап өтті.
– Сіз Қазақстанның сенімді досы әрі халықаралық деңгейдегі көрнекті мемлекет қайраткерісіз. Екіжақты қарым-қатынасты табысты дамытуға бағытталған сындарлы ұстанымыңызды жоғары бағалаймын. Сіз өзара ықпалдастықты ілгерілету жолында аянбай еңбек етіп келесіз, сол себепті байланыстарымыздың келешегіне сеніммен қараймыз. Елдеріміз арасындағы саяси, сауда-экономикалық және мәдени-гуманитарлық ынтымақтастықты дамытуға зор үлес қосқаныңыз үшін Сізге І дәрежелі «Достық» орденін табыстау туралы шешім қабылдадым. Бұл жоғары марапат қазақ-чех берік достығының жарқын символына айналады. Серіктестігіміз болашақта да жанданып, нығая беретініне сенімдімін, – деді Президент.
Өз кезегінде Андрей Бабиш көрсетілген құрмет үшін алғыс білдірді. Оның айтуынша, екі ел арасындағы ынтымақтастық тұрақты дамып келеді.
– Екі ел арасындағы ынтымақтастықтың нәтижелі дамып келе жатқанына шынайы қуаныштымын. Саяси диалогымыз ашық әрі сындарлы сипатқа ие. Халықаралық аренадағы ықпалдастығымыз тұрақтылыққа, бейбітшілік пен серіктестікке бейіл екенімізді көрсетеді. Чех Республикасы Қазақстанның әлемдік аренадағы сенімді әріптесі екенін мақтан тұтады. Осы жоғары марапатқа лайық көргеніңіз үшін алғыс айтамын. Алдағы уақытта да халықтарымыз арасындағы достықты тереңдету және халықаралық серіктестікті нығайту бағытындағы жұмысты жалғастыра береміз, – деді Чехия Премьер-министрі.
