Мемлекет басшысы «Qarmet» АҚ директорлар кеңесінің төрағасы Андрей Лаврентьевті қабылдады. Кездесу барысында компанияның биылғы жұмысының алдын ала қорытындылары мен инвестициялық бағдарламалардың негізгі бағыттары таныстырылды, – деп хабарлайды 7-su.kz ақпараттық порталы.
Лаврентьевтің айтуынша, екі жыл ішінде компания қызметінде оң динамика байқалған. Болат өндірісі 22 пайызға, көмір концентраты 26 пайызға, темір кені 32 пайызға өскен. Өнімнің өзіндік құны 28 пайызға төмендеп, шығарылатын маркалардың саны 260-тан 350-ге дейін артқан.
Компания тоғыз ірі инвестициялық жобаны қамтитын кешенді бағдарламаны іске асырып жатыр. Бұл бастама елдегі болат өндірісін жүйелеуге және металл прокаты импортының үлесін азайтуға бағытталған. Сонымен қатар атом электр станциясы құрылысына арналған жоғары сапалы жаңа болат маркаларын шығару жолға қойыла бастаған.
Көмір және тау-кен бағыттарын дамыту бағдарламасы да таныстырылды. Qarmet-ке қарасты медициналық және білім беру ұйымдары жаңғыртылып, еңбек қауіпсіздігіне қатысты шаралар күшейтілуде. Компания мен кәсіподақ арасында жасалған жаңа ұжымдық келісімшарт 35 мың жұмысшыға әлеуметтік кепілдік береді.
Сондай-ақ Qarmet жанынан ірі металлургиялық кластер құрылып жатыр. Бұл шағын және орта бизнеске шикізатты терең өңдеу арқылы өндіріс көлемін арттыруға мүмкіндік береді. Бағдарлама «Бәйтерек» ұлттық холдингімен бірлесіп жүзеге асырылмақ. Машина жасау кәсіпорындарын отандық болатпен қамтамасыз ету бойынша да жүйелі жұмыс жүргізіліп жатыр.
Президент компанияның металлургия кешеніндегі нәтижелеріне оң баға беріп, жоспарланған жұмыстарды қолдайтынын айтты. Сонымен қатар кәсіпорынды толық жаңғырту, әлеуметтік мәселелерді шешу, экологиялық ахуалды жақсарту және машина жасау саласын дамыту қажеттігін атап өтті.
