Мемлекет басшысы Қасым-Жомарт Тоқаев Ресей Федерациясының сыртқы істер министрі Сергей Лавровты қабылдады, – деп хабарлайды 7-su.kz ақпараттық порталы.
Кездесу барысында Президент Қазақстан мен Ресей арасындағы қарым-қатынастар стратегиялық серіктестік және одақтастық рухында дамып келе жатқанын атап өтті. Қасым-Жомарт Тоқаев жоғары деңгейде қол жеткізілген уағдаластықтарды нақты жүзеге асырудың, сондай-ақ сауда-экономикалық, инвестициялық және мәдени-гуманитарлық байланыстарды одан әрі нығайтудың маңыздылығына тоқталды.
Тараптар Ресей президенті Владимир Путиннің мамыр айының соңында Қазақстанға жоспарланған сапарына дайындық мәселелерін талқылады. Мемлекет басшысы Астананың бұл сапарға айрықша мән беріп отырғанын жеткізді.
«Бұл сапарды биылғы екіжақты күн тәртібінің ең негізгі іс-шарасы ретінде қарастырамыз. Екі елдің одақтастық қатынастарын ілгерілетуде бұл сапар маңызды рөл атқарады деп сенеміз», – деді Қасым-Жомарт Тоқаев.
Өз кезегінде Сергей Лавров Президентке Ресей басшысының сапарына дайындық барысы туралы мәлімет берді. Сонымен қатар ол Қазақстан мен Ресей арасындағы көпжоспарлы ынтымақтастықтың негізгі бағыттары Үкіметтер мен сыртқы істер министрліктері деңгейінде пысықталып жатқанын айтты.
Кездесу соңында Қасым-Жомарт Тоқаев пен Сергей Лавров халықаралық және өңірлік күн тәртібіндегі өзекті мәселелер бойынша пікір алмасты.
