Президент Қасым-Жомарт Тоқаев Сауд Арабиясының Тақ мұрагері Мұхаммед бен Салман Әл Саудпен телефон арқылы сөйлесті, – деп хабарлайды 7-su.kz ақпараттық порталы.
Әңгімелесу барысында Мемлекет басшысы Таяу Шығыстағы қақтығыстың ушығуы тек өңірлік емес, жаһандық қауіпсіздік пен тұрақтылыққа да елеулі қатер төндіретініне назар аударды.
Президент пен Тақ мұрагері қақтығысқа қатысы жоқ елдердің аумағына шабуылдардың жалғасуы мұсылман үмбеті үшін өзара құрмет пен төзімділік айы саналатын қасиетті Рамазан кезеңінде орын алып отырғанына алаңдаушылық білдірді.
Қасым-Жомарт Тоқаев отандастарды Қазақстанға эвакуациялауға жәрдем көрсеткені үшін Корольдік Үкіметіне алғыс айтты.
Өз кезегінде Мұхаммед бен Салман Әл Сауд қолдау білдіргені үшін Қазақстан Президентіне ризашылығын жеткізіп, қасиетті Рамазан айында Қазақстан халқына ізгі тілегін жолдады.
Тараптар екіжақты қатынастарды жаңа сапалы деңгейге көтеру, сондай-ақ халықаралық аренада күш-жігерді үйлестіру мақсатында тұрақты саяси диалогты нығайтуға уағдаласты.
