Қазақстан Президенті Қасым-Жомарт Тоқаев Украинадағы қақтығысты реттеу бойынша келіссөз процесінің жандануына қолдау көрсететінін мәлімдеді, – деп хабарлайды 7-su.kz ақпараттық порталы.
Мемлекет басшысы Халықаралық бейбітшілік және сенім жылына, Халықаралық бейтараптық күні және Түрікменстанның тұрақты бейтараптығының 30 жылдығына арналған форумға қатысты. Тоқаев БҰҰ-ға мүше мемлекеттердің ауқымды диалог бастауын, ірі державалардың саяси ерік-жігер көрсетуін аса маңызды деп бағалады. Сондай-ақ Қазақстан Түрікменстан Президентінің БҰҰ бейбітшілік және бейтараптық университетін ашу жөніндегі ұсынысын қолдайтынын айтты.
Президент атап өткендей, қазіргі жаһандық ахуал бейбітшілік, сенім және ынтымақ құндылықтарын басты орынға қою арқылы әділетті әрі орнықты тәртіп орнатуға мүмкіндік береді.
– Қазірдің өзінде жаһан жік-жікке бөлінуден, тіпті ядролық соғыстан бас тартып, бейбітшілік, сенім, ынтымақ секілді құндылықтарды басшылыққа алған кезде әлемде әділетті және орнықты тәртіп орнатуға болатыны белгілі болды. Осы орайда еліміз Украинадағы қақтығысты реттеу бойынша келіссөз процесінің жандануына қолдау білдіреді. Ресей мен АҚШ президенттерінің Анкоридждегі кездесуінен кейін бейбітшілік пактісінің негізгі ережелері белсенді талқылана бастады. Бұл көптен күткен бітімге келу мүмкіндігін жақындатты, – деді Мемлекет басшысы.
