Қазақстан мен Израиль президенттері Қасым-Жомарт Тоқаев пен Ицхак Герцог Astana Hub базасында орналасқан Alem.ai Халықаралық жасанды интеллект орталығына барды, – деп хабарлайды 7-su.kz ақпараттық порталы.
Мемлекет басшылары орталықтың қызметімен танысып, мұнда таланттарды іріктеу мен даярлаудан бастап, жасанды интеллект негізіндегі шешімдерді жаһандық деңгейде енгізуге дейінгі технологиялық дамудың толық циклі жүзеге асырылатыны туралы ақпарат алды. 
Израиль президентіне Қазақстанның жаппай цифрландыру бағытындағы жетістіктері және жасанды интеллектіні экономика мен әлеуметтік саланың негізгі бағыттарына енгізу тәжірибесі таныстырылды.
Сонымен қатар, тараптарға Astana Smart City жобасы жөнінде мәлімет берілді. Ауқымды бастама аясында елорданың жаңа интеллектуалдық инфрақұрылымын қалыптастыру көзделіп отыр.
