Конституцияға өзгертулер мен толықтырулар енгізу жөніндегі бүкілхалықтық референдум жазиралы Жаркент өңірінде де жоғары белсенділікпен өтті. 5 маусым күні таңнан бастап аудандағы барлық учаскеде ағылған тұрғындар қарасы көп екендігі байқалды.
Бұл күні Жаркент қаласындағы № 6 мектеп-интернат ғимаратына орналасқан №736 референдум учаскесіне барып, жай-күйімен таныстық. Бірінші болып сұхбат құрған адамымыз Жаркент шегара отрядының қызметкері Шалқар Сейітжанов азаматтық парызын өтеуге асығып жеткенін айтты.
– Біздің шекарашылар түгел дерлік осы учаскеде өз қалауын жасауда. Ал алыс заставадағы сарбаздар мен офицерлерге референдум бюллетеньдері жеткізілетінін білеміз. Ел іргесін күзетіп жүрген азаматтар жалпыхалықтық маңызды таңдаудан шет қалмайды, – деді Шалқар.
Учаскедегі бақылаушылардың бірі, «Талдықорған аймақтық жұмыспен қамтуға жәрдемдесу қоры» қоғамдық қозғалысының өкілі, Рахметолла Тұрлыбаевтан учаскедегі дауыс берудің барысын сұрадық.
– Таңғы сағат 8.00-ден бері өз міндетімізді атқарып отырмыз. Дауыс берушілер белсенділігі жоғары, 1,5 сағатта 170 адам келіп, өз қалауларын жасап кетті. Қазірше тәртіп бұзған ешкімді байқамадық, – деді ол.
Кешке осы учаскедегі дауыс беру нәтижесін сұрап білгенімізде референдум комиссиясының бізге берген мәліметі бойынша 1660 бюллетеньнің 1177-сі қолданылыпты. Яғни осы учаскеде дауыс беруге тиіс қала тұрғындарының 71 пайыздан астамы өз қалауын жасаған.
Мырзағали НҰРСЕЙІТ,
Панфилов ауданы
